маориф
ДДОТ: шумораи донишҷӯёни хориҷӣ наздик ба 2000 нафар аст
Зариф Шарифов, ректори Донишгоҳи давлатии омӯзгории Тоҷикистон ба номи Садриддин Айнӣ, дар нишасти матбуотӣ гуфт, ки дар донишгоҳ 13 факулта ва 48 кафедра фаъолият дорад. Дар 46 ихтисос вобаста ба дараҷаҳои маълумоти бакалавр, магистр ва мутахассис донишҷӯён таҳсил менамоянд. Имсол вобаста ба талаботи давр 8 ихтисоси нав таъсис дода шуд. Дар 5 факулта низоми кредитии таҳсилот ҷорӣ гардид. Ректор ҳамчунин изҳор дошт, ки дар давраи ҳисоботӣ 8 монография, 24 номгӯй китоби дарсӣ, 34 барномаи таълимӣ, 39 маводи таълимӣ ва дастурҳои методӣ, 218 мақолаи илмӣ-оммавӣ, 182 фишурдаи илмӣ ба табъ расиданд.
Таҳти роҳбарии устодони варзидаи донишгоҳ ба иҷрои корҳои илмӣ-тадқиқотӣ аз рӯи 60 проблемаи табиӣ, техникӣ ва гуманитарӣ, аз ҷумла 7 мавзӯи фармоишӣ тадқиқот бурда ба натиҷаҳои назаррас ноил гаштаанд.
Вобаста ба пурсишҳои хабарнигорон роҳбари таълимгоҳ изҳор дошт, ки айни замон 751 нафар донишҷӯ тибқи Квотаи президентӣ таҳсил дорад. Шумораи умумии донишҷӯёни хориҷӣ 1932 нафар мебошад.
Абдулқодири РАҲИМ
Баёни ақида (0) Санаи нашр: №: Мутолиа карданд: 5528
