ҳуқуқ
ҶИНОЯТ ВА ҶАЗО
Заминфурӯшӣ боз ду мансабдорро ба курсии айбдорӣ шинонд
Агентии назорати давлатии молиявӣ ва мубориза бо коррупсияи Ҷумҳурии Тоҷикистон аз боздошти афроде хабар дод, ки дар ду ҳолат бо истифода аз мақоми хизматии худ ба заминфурӯшӣ даст задаанд.
Бино ба иттилои маркази матбуоти ангентӣ, Анвар Умарзода, раиси Ҷамоати деҳоти Яккатути ноҳияи Абдураҳмони Ҷомӣ, «бо мақсади ба даст овардани даромади муфт, бо суи-истифода аз мақоми хизматӣ барои ҷудо кардани қитъаи замини наздиҳавлигӣ аз заминҳои корами обии деҳаи Хуросон аз шаҳрванд “А” маротибаи аввал 5000 рубли русӣ, маротибаи дуюм 5000 сомонӣ гирифта, иловатан боз 45000 сомонӣ ба сифати пора талаб намудааст». Вале бори сеюм маблағи талабшуда ба ҷайби раис ворид нашуда, ӯ дар пайи чорабиниҳои оперативӣ – тафтишотӣ зимни гирифтани маблағи пора дар ҷойи ҳодиса дастгир ва нисбаташ парвандаи ҷиноятӣ оғоз шуда, тафтишоти пешакӣ идома дорад.
Мавриди дуюми заминфурӯшӣ дар ноҳияи Рӯдакӣ сабт шуда, Фазлиддин Каримов, муҳандис - заминсози Ҷамоати деҳоти Чоряккорони ноҳия, бо ҷурми қаллобӣ ва талаби пора боздошт шудааст. Ба иттилои манбаъ, заминсози ҷамоат аз як шаҳрванд, ки номаш ошкор нашудааст, барои ҷудо кардани 0,12 гектар қитъаи замини наздиҳавлигӣ ва тартиб додани ҳуҷҷати зарурӣ дар ин бора 10500 доллари амрикоӣ талаб намудааст.
Фазлиддин Каримов аз ин маблағ 500 долларашро гирифта, қарори раиси Ҷамоати деҳоти Чоряккорони ноҳияи Рӯдакиро оид ба додани 0,12 гектар қитъаи замин бо истифода аз техникаи компютерӣ сохтакорона тартиб додааст. Ӯ зимни гирифтани 10000 доллари дигари талабнамудааш, дастгир гардида, алайҳаш бо моддаи 247 қисми 4, 340 қисми 2 - и Кодекси ҷиноятии Ҷумҳурии Тоҷикистон парвандаи ҷиноятӣ оғоз шудааст.
Қаллобӣ дар ҳаҷми махсусан калон
Кормандони мақомоти корҳои дохилӣ дар ноҳияи Исмоили Сомонӣ дар асоси муроҷиати як сокини пойтахт марди 56 - солаеро боздошт намуданд, ки дар қаллобӣ бо ҳаҷми махсусан калон гумонбар мешавад.
Номбурда моҳи сентябри соли 2013 ба бовари марди 65 - солаи сокини пойтахт даромада ваъда додааст, ки хонаашро ба маблағи 300 000 доллари амрикоӣ фурӯхта медиҳад.
Дар пайи ин муомила марди 65 - сола дар идораи нотариалӣ хонаи худро ба номи «фурӯшанда» гузарондааст. Аммо ин марди қаллоб хонаро фурӯхта маблағашро ба манифати худ истифода карда, дар натиҷа ба соҳиби хона 100 000 доллари амрикоӣ заррарӣ моддӣ расондааст.
Ба иттилои сомонаи ВКД, тафтишот муайян намудааст, ки марди тақаллубкор, ҳамчунин, ба боварии марди 65 - солаи сокини кӯчаи У. Хайёми пойтахт даромада, аз ӯ 127 000 - доллари амрикоӣ гирифта, то ҳол маблағашро бар нагардондааст.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 28.05.2018 №: 105 Мутолиа карданд: 1110
