порлумон
СОЗИШНОМА ОИД БА АЛОҚАИ БАЙНАЛМИЛАЛИИ АВТОМОБИЛӢ БА ТАСВИБ РАСИД
Бо назардошти кушода шудани гузаргоҳҳои сарҳади давлатӣ байни Ҷумҳурии Тоҷикистон ва Ҷумҳурии Ӯзбекистон ба роҳ мондани ҳамлу нақли байналмилалии дуҷонибаи мусофирон тавассути автобусҳо, инчунин, интиқоли транзитии онҳо ба Қазоқистон, Федератсияи Русия ва дигар давлатҳои хориҷи дуру наздик имконпазир мегардад. Ин бевосита барои рушди соҳаи нақлиёт, интиқоли сайёҳону муҳоҷирони меҳнатӣ бо нархи нисбатан арзон мусоидат мекунад.
Ин нукта зимни баррасии Созишномаи байни Ҳукумати Ҷумҳурии Тоҷикистон ва Ҳукумати Ҷумҳурии Ӯзбекистон дар бораи алоқаи байналмилалии автомобилӣ аз ҷониби Завқибек Худоёрзода, вазири нақлиёти Ҷумҳурии Тоҷикистон, дар ҷаласаи Маҷлиси намояндагон ба вакилони мардумӣ ироа гардид. Мавсуф иброз дошт, ки созишномаи мазкур ҷиҳати эҳёи ҳамкорӣ бо Ҷумҳурии Ӯзбекистон дар соҳаи ҳамлу нақли бору мусофирон равона гардидааст. Баъди тасдиқи созишнома воситаҳои нақлиёти боркашу мусофирбар метавонанд ҳамлу нақли дуҷониба ва транзитиро тариқи қаламрави ҳамдигар амалӣ намоянд, ки бевосита ба рушди савдо, сайёҳӣ, гардиши молу маҳсулоти ду кишвар такони ҷиддӣ мебахшад. Ҳамзамон, бо кушода шудани хатсайрҳои байналмилалӣ тавассути фаъолияти терминалҳои нави мусофирбарӣ имкони хариди автобусҳо аз ҷониби бахшҳои хусусӣ, сохтмони инфрасохтори зарурӣ, мағозаҳо, нуқтаҳои хидматрасонии техникӣ, пайдо шудани хатсайрҳои дохилӣ ва ҷойҳои нави корӣ пайдо мешаванд.
Ин ба баланд бардоштани сатҳи зиндагии мардум, таҳкими муносибатҳои дуҷониба, барқарор шудани муносибатҳои дӯстонаи шаҳрвандони ду кишвар, зиёд гардидани гардиши молу маҳсулот ва болоравии иқтидори транзитӣ, ки барои рушди иқтисодиёти ҷумҳурӣ равона мешавад, мусоидат мекунад. Созишнома аз ҷониби вакилони мардумӣ ба тасвиб расид.
Мунаввари САФАР, «Ҷумҳурият»
Баёни ақида (0) Санаи нашр: 29.05.2018 №: 106 Мутолиа карданд: 5272
