ҳуқуқ
ҲАМОИШИ МУҲИМ ДАР ТАЪМИНИ АМНИЯТ ВА СУБОТ
Бо ташаббуси Ҳаракати ҷамъиятии «Дӯстони Россия» ва Маркази тадқиқоти стратегии назди Президенти Ҷумҳурии Тоҷикистон мизи гирд дар мавзӯи «Саҳми Президенти Ҷумҳурии Тоҷикистон Эмомалӣ Раҳмон ва Президенти Федератсияи Россия Владимир Путин дар таъмини амният ва субот дар марзҳои ҷануби ИДМ» баргузор гардид.
Дар ҳамоиш олимону коршиносон, таҳлилгарони масоили Афғонистон ва минтақа, намояндагони мақомоти давлатӣ, Академияи илмҳои Ҷумҳурии Тоҷикистон, мақомоти қудратӣ ва ҳимояи ҳуқуқу тартибот ва хадамоти махсус, ҳамчунин, намояндагони корпуси дипломатӣ ва созмонҳои байналмилалии муқими Тоҷикистон ширкат варзиданд.
Дар ин чорабинии муҳим саҳми бузурги Президенти Ҷумҳурии Тоҷикистон Эмомалӣ Раҳмон ва Президенти Федератсияи Россия Владимир Путин дар таъмини амният ва субот дар марзҳои ҷануби кишварҳои аъзои СААД, махсусан дар Ҷумҳурии Тоҷикистон таъкид гардид.
Зимнан, ба таври равшану возеҳ зикр гардид, ки сарони ҳар ду давлат тадбирҳои сиёсию дипломатӣ, ҳарбию техникӣ ва созмондиҳии сохтори таъмини амният ва субот дар минтақаро заминагузорӣ кардаанд. Президенти Ҷумҳурии Тоҷикистон Эмомалӣ Раҳмон ва Президенти Федератсияи Россия Владимир Путин дар асоси ҳусни тафоҳум ва эътимоди мутақобилаи дӯстӣ ва ҳамкорӣ ба шарикии стратегии Тоҷикистон ва Россия таҳким мебахшанд ва соҳаи низомиро барои ҳимояи боэътимоди сарҳади ҷанубии кишварҳои узви СААД тақвият медиҳанд. Ҳамкории наздики сохторҳои қудратӣ, ҳифзи ҳуқуқу тартибот ва хадамоти махсуси ду кишвар дар мубориза бо терроризми байналмилалӣ ва ифротгароӣ, дар муқобила бо амалҳои тахрибии гурӯҳҳои бунёдгаро, ҷинояткории созмонёфтаи фаромиллӣ, қочоқи аслиҳа ва маводи мухаддир таъмин карда мешавад.
Мунаввари САФАР, «Ҷумҳурият»
Баёни ақида (0) Санаи нашр: 30.05.2018 №: 107 Мутолиа карданд: 1115
