порлумон
АМНИЯТИ ИТТИЛООТӢ. ҲАМКОРИИ ДАВЛАТҲОИ АЪЗОИ СААД ТАВСЕА МЕЁБАД
Дар ҷаласаи Маҷлиси намояндагони Маҷлиси Олии мамлакат Созишнома оид ба ҳамкории давлатҳои аъзои Созмони Аҳдномаи амнияти дастаҷамъӣ дар соҳаи таъмини амнияти иттилоотӣ ба тасвиб расид.
Мансурҷон Умаров, муовини якуми раиси Кумитаи давлатии амнияти миллии Ҷумҳурии Тоҷикистон, зимни баррасии созишномаи мазкур иброз дошт, ки он аз ҷониби Кумитаи давлатии амнияти миллӣ дар мувофиқа бо вазорату идораҳои дахлдор таҳия гардидааст. Созишномаи мазкур аз ҷониби сарони давлатҳои аъзои Созмони Аҳдномаи амнияти дастаҷамъӣ 30 ноябри соли 2017 дар шаҳри Минск ба имзо расонда шудааст. Созишнома ҳадаф, самт, шакл ва механизми ҳамкориҳои давлатҳои аъзои СААД – ро ҷиҳати таъмини амнияти иттилоотӣ дар фазои давлатҳои аъзои созмон пешбинӣ мекунад. Мақсади созишнома рушди ҳамкории тарафҳо баҳри таъмини амнияти иттилоотии давлатҳои аъзои созмон мебошад.
Тибқи созишнома ҳамаи тарафҳо уҳдадор мешаванд, ки оид ба таъмини амнияти иттилоотӣ дар самтҳои асосӣ, аз ҷумла коркард ва пешбурди заминаҳои ҳуқуқии ҳамкорӣ ва мусоидат дар такмили онҳо, ташаккули механизмҳои амалӣ, рушди чораҳои зарурӣ оид ба устувор намудани эътимод дар бахши амнияти иттилоотӣ, такмили заминаи технологии таъмини амнияти иттилоотӣ, фароҳам овардани шароит барои ҳамкории мақомоти салоҳиятдор ҳамкорӣ намоянд.
Анвар Тағоймуродов, вакили порлумон, таҳкими сулҳу амният, суботи байналмилалӣ ва минтақавӣ, аз ҷумла таъмини амнияти иттилоотӣ, роҳ надодан ба истифодаи технология ва захираҳои иттилоотие, ки барои ноором кардани вазъият дар ҳудуди давлатҳои аъзои созмон равона шудаанд, аз ҷумлаи ҳадафҳои ин санади муҳим арзёбӣ намуд.
Мунаввари САФАР, «Ҷумҳурият»
Баёни ақида (0) Санаи нашр: 22.06.2018 №: 122-123 Мутолиа карданд: 5379
