номаҳо
ПУДРАТЧӢ Ё ПАЙМОНКОР?
Ман, ки ба сифати сохтмончӣ фаъолият доштам, ҳамеша диққатамро ин масъала ҷалб мекард, албатта, давоми даҳсолаҳо. Ба забони ноби тоҷикии мо пеш аз замони истиқлол вожаи «пудратчӣ» дохил шудаву мақоми устувор пайдо намуда буд. Ҳарчанд фаҳми он барои на ҳамаи мардум ба осонӣ даст медод.
Барои сохтмончиён бошад, чун истилоҳ мавриди истифода қарор дошт. Камтар аз аҳли ин соҳа дар мавриди забону сарчашмаи воридшавии он ба забони мо меандешид. Ҷойи таассуфи бештар он буд, намехостанд ҳаммаънои он, яъне «паймонкор»-ро истифода бикунанд ва ё барояш мақоми пешинаашро қоил бошанд. «Паймонкор», яъне чӣ? Паймонкор оне маҳсуб мешавад, ки дар асоси шартнома ё қарордод кор мекунад. Калимаи мураккаби мазкур аз «паймон» ва «кор» сохта шудааст. Ҳар ду қисмат низ тоҷикиянд. Онро ҳамаи ҳамзабонони мо, чи дар кишварамон ва чи берун аз он мефаҳманд. Балки ҳеҷ ба шарҳу тавзеҳ ниёз надорад.
Чанде пештар суханронии Сарвари давлат муҳтарам Эмомалӣ Раҳмонро зимни сафари корӣ ба вилояти Суғд шунидам. Пешвои миллат дар он маҳз калимаи «паймонкор», на «пудратчӣ» - ро истифода намуданд. Ба ростӣ, бисёр шод гардидам ва мутмаин, ки ба пайравии Президенти мамлакат аз ин пас «паймонкор» мавриди истифодаи умум қарор мегирад. Охир, забони гуфтору навиштори муҳтарам Эмомалӣ Раҳмон, ки бисёр тоза ва ноб мебошад, барои на танҳо мо, сохтмончиён, балки ҳамаи қишри ҷомеа фаҳмост. Он чун меъёр пазируфта шудааст. Аз ин рӯ, дар мавриди мазкур низ бояд пайрави Пешво бошем.
Х. РАҶАБИЁН, ноҳияи Восеъ
Баёни ақида (0) Санаи нашр: 16.07.2018 №: 139 Мутолиа карданд: 3557
