ҳуқуқ
С. СУЛТОНЗОДА: "БЕШ АЗ 180 МИЛЛИОН СОМОНӢ ЗАРАРИ МОЛИЯВӢ БАРҚАРОР ШУД"
Агентии назорати давлатии молиявӣ ва мубориза бо коррупсияи Ҷумҳурии Тоҷикистон дар шаш моҳи аввали соли ҷорӣ дар вазорату идораҳо, мақомоти маҳаллии ҳокимияти давлатӣ, марказҳои идораи барномаҳои аз тарафи созмонҳои байналмилалии аз ҷиҳати молиявӣ маблағгузоришаванда, субъектҳои хоҷагидории давлатӣ ва дигар муассисаҳои буҷетӣ як қатор тафтишу санҷишҳо гузаронда, 334,7 миллион сомонӣ зарари молиявиро ошкор намуд.
Тавре Сулаймон Султонзода, директори агентӣ, зимни нишасти матбуотӣ иттилоъ дод, дар натиҷа аз 334,7 миллион сомонии зарари молиявии ошкоршуда 182,3 миллион сомонии он ба буҷети давлат барқарор карда шуд, ки 51,8 фоизи зарари ошкоршударо ташкил медиҳад.
Аз тарафи воҳидҳои ҳифзи ҳуқуқи ин ниҳод дар ин давра 1301 ҷинояти коррупсионӣ, иқтисодии хусусияти коррупсионидошта ва ҷиноятҳои ба андоз алоқаманд ошкор шуд, ки 404 - тои он ба гурӯҳи ҷиноятҳои вазнин шомиланд. Инчунин, 376 ҷинояти қаллобӣ, 76 ҷиноят вобаста ба гирифтан ва додани пора, 11 ҳолатӣ саркашӣ аз супурдани маблағи андоз, ҳамчунин, ришвадиҳии тиҷоратӣ ва гирифтани «мукофот» бо роҳи тамаъҷӯӣ муайян гардид.
Ба гуфтаи С. Султонзода, кормандони агентӣ дар нимсолаи аввал 775 ҳолати ҳуқуқвайронкунии маъмурии хусусияти коррупсионидоштаро ошкор намуданд. Нисбат ба шахсони талаботи қонунро вайронкарда ба маблағи 796,7 ҳазор сомонӣ ҷарима татбиқ гашта, 767,3 ҳазор сомонии он ба буҷети давлат ворид шудааст.
Зимни санҷишҳо 50 ҳолати вайрон намудани талаботи моддаи 9 - и Қонуни Ҷумҳурии Тоҷикистон «Дар бораи мубориза бар зидди коррупсия» ошкор гардид, ки манъ будани хизмати якҷоя ва таъйини хешовандони наз-дик ба мансабҳои давлатӣ ё ба мансабҳои ба онҳо баробаркардашударо пешбинӣ менамояд. Ғайр аз ин, кормандони агентӣ дар якҷоягӣ бо масъулони комиссияҳои танзими анъана ва ҷашну маросим ҷиҳати таъмини иҷрои Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» 122 ҳолати қонуншиканиро ошкор ва нисбат ба қонунвайронкунандагон чорандешӣ намуданд. Ҷиҳати пешгирӣ ва бартараф кардани қонуншиканиҳои зерин минбаъд аз ҷониби агентӣ тадбирҳои муассир андешида мешаванд.
Лашкар ШАРИФ, «Ҷумҳурият»
Баёни ақида (0) Санаи нашр: 2.08.2018 №: 152 Мутолиа карданд: 1125
