ҳуқуқ
ХАДАМОТИ ГУМРУК.
НАЗОРАТ ПУРЗӮР МЕГАРДАД
Дар шашмоҳаи аввали соли ҷорӣ ҷиҳати мубориза бар зидди ҳуқуқвайронкуниҳо дар дидбонгоҳҳои гумрукӣ, шоҳроҳҳо ва нуқтаҳои савдо рейдҳои алоҳида гузаронда шуда, воридоти ғайриқонунии маводи сӯзишворӣ, ангишт, нуриҳои минералӣ, маҳсулоти қаннодӣ, лампаҳои тафсон, мева, чойи хушк, доруворӣ, хӯроки паранда, ҳасиб, гӯшти қиммакардашуда, тухми мурғ ва дигар намуди маҳсулот ошкор гардиданд.
Ин нуктаро Хуршед Каримзода, сардори Хадамоти гумрук, зимни нишасти матбуотӣ ба хабарнигорон иттилоъ дод. Ба гуфтаи ӯ, дар ин давра аз ҷониби кормандони воҳидҳои мубориза бар зидди ҳуқуқвайронкуниҳои гумрукӣ 2261 ҳолати қонуншиканӣ ошкор гардид. Аз ин миқдор 45 ҳолат ҷиноят буда, 23 ҳолат ба қочоқи молу воситаҳои нақлиёт, 3 ҳолат ба гардиши ғайриқонунии маводи нашъаовар ва 19 ҳолат ба дигар ҷиноятҳои соҳаи фаъолияти гумрук марбут мебошанд.
Гуфта шуд, ки дар натиҷаи баррасии 2216 парвандаи ҳуқуқвайронкунии маъмурӣ, 1835 нафар шахсони воқеӣ ва ҳуқуқӣ ба ҷавобгарии маъмурӣ кашида шуда, 1256 парванда барои баррасӣ ба мақомоти судӣ ирсол гардид. Дар натиҷа, ба маблағи 4 миллиону 456 ҳазору 522 сомонӣ пардохтҳои гумрукӣ ва ба маблағи 3 миллиону 697 ҳазору 155 сомонӣ ҷарима ба буҷаи давлат ворид карда шуд.
Дар нимсолаи сипаришуда аз ҷониби Хадамоти гумруки назди Ҳукумати Ҷумҳурии Тоҷикистон дар якҷоягӣ бо мақомоти дахлдори давлатӣ ҷиҳати ҳимояи ҳифзи амнияти миллӣ, ҳаёт ва саломатии инсон 13 ҳолати интиқоли молҳои пастсифат ошкор гардид.
Ёдрас мешавем, ки охири соли сипаришуда Президенти кишвар муҳтарам Эмомалӣ Раҳмон дар маҷлиси Ҳукумат аз воридоти гӯшти пастсифати мурғ ба ҷумҳурӣ изҳори нигаронӣ карда, барои пешгирӣ аз ин ҳолат ба мақомоти дахлдори давлатӣ дастуру супоришҳои қатъӣ дода буданд.
Лашкар ШАРИФ, «Ҷумҳурият»
Баёни ақида (0) Санаи нашр: 3.08.2018 №: 153 Мутолиа карданд: 902
