номаҳо
БА ПИРӮЗИИ ҲАҚИҚАТ БОВАР ДОРАМ
Ман сокини шаҳри Бохтар, кӯчаи С. Мирзоев, хонаи 19, ҳуҷраи 2 (манзили баҳсӣ) будам. Аз моҳи сентябри соли 2017 инҷониб аз манзилам маҳрум ва ҳоло бо даҳ нафар аҳли оилаам сарсону саргардонам.
Вобаста ба баҳси манзил чандин марҳилаи судиро гузашта, қарор додам, ки ин навбат арзи худро тавассути гӯшаи «Шаҳрванд» - и Нашрияи расмии Ҷумҳурии Тоҷикистон - рӯзномаи «Ҷумҳурият» ба самъи сохтору мақомоти дахлдори давлатӣ расонам. Танҳо ба умеде, ки баҳси мо дар доираи қонун ва риояи адолати судиву иҷтимоӣ роҳи ҳалли худро пайдо созад.
Манзиле, ки мавриди баҳс қарор дорад, ман бо маблағи шахсии худ аз Р. Маҳмадалиев тавассути шартномаи шифоҳӣ харида будам. Аммо, дигарон бо собиқ соҳибхона якҷоя шуда, бо роҳи қаллобӣ хонаро соҳибӣ карданд. Дар ин робита ба суди шаҳри Бохтар муроҷиат кардем. Суд харидуфурӯши байни С. Саид-алиев ва Р. Маҳмадалиевро аз 24. 06. 2003 асоснок ҳисобида, шаҳодатнома оид ба бақайдгирии давлатии манзили истиқоматии мазкур, ки аз тарафи КДФ «Бақайдгирии молу мулки ғайриманқул» - и шаҳри Бохтар ба ман дода шуда буд, рад кард ва моро аз манзили баҳсӣ кӯчонданд. Ҳол он ки шартномаи шифоҳии байни ман ва собиқ соҳибхона - Р. Маҳмадалиев аз тарафи суд оид ба эътирофи ҳуқуқи моликият расман тасдиқ шуда, дар ин маврид ҳалнома ҳам баромадааст.
Сипас, ба коллегияи судӣ оид ба парвандаҳои граждании суди вилояти Хатлон шикояти кассатсионӣ бурдем, аммо он ҳам ҳалномаи суди зинаи аввалро бетағйир гузошт. Минбаъд шикояти назоратии ман дар коллегияи кассатсионии суди вилояти Хатлон ҳам рад шуд.
Баъдан, аз ноилоҷӣ ба Суди Олии Ҷумҳурии Тоҷикистон шикояти назоратӣ пешниҳод намудам. Дар асоси таъйиноти судяи Суди Олӣ аз 19 июни соли 2018 ирсоли парванда ҷиҳати баррасӣ намудани он дар суди марҳилаи назоратӣ рад гардид. Ҳоло аризаи шикояти назоратии ман дар раёсати Суди Олӣ қарор дорад ва умед мебандам, ки дар ин марҳила ҳақро ба ҳақдор мерасонанд.
Маҳмадшариф ГУЛОВ,
сокини шаҳри Бохтар
Баёни ақида (0) Санаи нашр: 14.08.2018 №: 160 Мутолиа карданд: 1243
