маориф
СУҒД. МАОРИФ ДАР МАДДИ АВВАЛ
Соли нави таҳсилро 3 ҳазору 364 хонандаи вилояти Суғд дар синфхонаҳои нави замонавии ҷавобгӯ ба меъёрҳои ҷаҳонӣ истиқбол мегиранд. Аз ҷумла, дар Ҷамоати деҳоти Овчӣ - қалачаи ноҳияи Бобоҷон Ғафуров, деҳаи Навгилеми шаҳри Исфара ва шаҳраки Ваҳдати шаҳри Истаравшан мактабҳои наву замонавӣ дарҳои худро боз мекунанд. Умуман, то охири соли равон дар вилояти Суғд, дар маҷмӯъ, аз ҳисоби ҳамаи сарчашмаҳо 43 иншооти соҳаи маориф бо фарогирии 6 ҳазору 633 ҷойи нишаст мавриди баҳрабардорӣ қарор мегирад. Ин нишондиҳандаи баландтарин дар солҳои охир маҳсуб меёбад.
Бино ба гуфтаи Осим Каримзода, сардори раёсати маорифи вилояти Суғд, дар шаҳру ноҳияҳои вилоят мутобиқи барномаҳои давлатӣ сохтмони бинои нави муассисаҳои таълимӣ ба ҷойи биноҳои садамавӣ, ба анҷом расондани корҳо дар муассисаҳои сохтмонашон нотамом, бо суръат ва сифати баланд идома доранд.
Ёдовар мешавем, ки моҳи июни соли ҷорӣ бо иштироки Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар шаҳри Истаравшан муассисаҳои таълимии №№ 64 ва 65 барои 640 хонанда, дар ноҳияи Шаҳристон муассисаи таълимии № 13 барои 240 хонанда ва мактаб - интернат барои 50 хонанда ва дар маркази вилоят - шаҳри Хуҷанд кӯдакистони № 28 барои 320 кӯдак ва кӯдакистони хусусӣ дар маҳаллаи 18 мавриди баҳрабардорӣ қарор гирифтанд.
Аз ҷониби мақомоти иҷроияи ҳокимияти давлатии вилоят соли таҳсили 2018 - 2019 бунёди 12 муассисаи таълимии томактабӣ ва сохтмони 6 бинои муассисаҳои таълимиву синфхонаҳои иловагӣ пешбинӣ шудаанд.
Хушбахтона, имрӯз иқдомҳои наҷибе дар мавриди бунёди муассисаҳои таълимӣ аз ҷониби волидон ба мушоҳида мерасанд. Соли ҷорӣ аз ҷониби соҳибкорон ва кумитаи падару модарон бунёди синфхонаҳои иловагӣ дар назди МТМУ №№ 16, 63, 73, 90, 94 ва таъмиру азнавсозии муассисаҳои таълимии №№ 18, 23, 35, 40 – и шаҳри Панҷакент, 6 синфхонаи иловагии дар назди муассисаи таҳсилоти миёнаи умумии № 65 дар Ҷамоати деҳоти Чоркӯҳи шаҳри Исфара, дар маҷмӯъ 43 иншооти таълимӣ пешбинӣ гардида, корҳои сохтмонӣ идома доранд. Мутобиқи барномаи дар сатҳи вилоят таҳияшуда солҳои наздик боз дар шаҳру навоҳии шимоли мамлакат бинои 46 муассисаи таълимии садамавӣ ва 228 мактаб, 406 синфхона азнавсозию таъмир хоҳанд шуд.
Тибқи Қарори Ҳукумати Ҷумҳурии Тоҷикистон аз 3 майи соли 2014 “Дар бораи Барномаи рушди муассисаҳои таҳсилоти томактабӣ ва миёнаи умумии хусусӣ барои солҳои 2014 - 2020” дар давоми 7 сол дар вилоят таъсиси 280 муассисаи таҳсилоти томактабӣ ва 135 муассисаи таҳсилоти миёнаи умумии ғайридавлатӣ пешбинӣ гардидаанд. Дар муҳлати амали барномаи мазкур дар вилоят 35 муассисаи таълимии томактабӣ ва 5 муассисаи таҳсилоти миёнаи умумии хусусӣ ташкил гардида, дар умум 46 муассисаи таҳсилоти томактабии хусусӣ ва 25 муассисаи таҳсилоти миёнаи умумии хусусӣ фаъолият намуда истодаанд. Нисбат ба соли гузашта шумораи муассисаҳои томактабӣ дар шаҳру ноҳияҳои вилоят 9 адад афзудааст. Марказҳои инкишофи кӯдакони синни томактабии шаҳру ноҳияҳо аз 742 гурӯҳ иборат буда, дар онҳо 15 ҳазору 695 кӯдак ба таълиму тарбия фаро гирифта шудаанд. Фарогирии кӯдакон ба муассисаҳои таҳсилоти томактабӣ 15,1 дарсад ва якҷоя бо Маркази инкишофи кӯдакони синни томактабӣ 20,2 дарсадро ташкил медиҳад. Вале, ин нишондиҳанда ҳадди ниҳоӣ нест ва оянда корҳо дар ин самт идома меёбанд.
Ҷовиди АШТӢ, “Ҷумҳурият”
Баёни ақида (0) Санаи нашр: 23.08.2018 №: 167 Мутолиа карданд: 985
