маориф
ДАРС
Дар нимаҳои аввали соли таҳсил муаллими яке аз синфҳои поёнӣ бо сабаби мушкилоти шахсӣ ба муддати як моҳ аз мактаб рухсатӣ гирифт. Ба ҷои ӯ муаллими наве муваққатан ба кор омад. Ӯ дарсро шурӯъ кард ва як - як аз бачаҳо мавзӯъро пурсид.
Вақте яке аз хонандагон ба суоле посухи нодуруст дод, ҳамсабақонаш хандиданду масхарааш карданд. Муаллим пай бурд, ки шогирд аз дониши нисбатан камтаре бархӯрдор аст.
Пас аз анҷоми дарс муаллим он хонандаро наздаш хонд ва ба ӯ варақае дод, ки дар он байте навишта буд. Аз ӯ хост, ки то фардо байтро азёд кунад, аммо дар ин бора ба касе чизе нагӯяд.
Рӯзи дигар муаллим он байтро дар тахтаи синф навишт. Баъди чанд дақиқа навиштаро пок намуд ва аз хонандагон хоҳиш кард, ки ҳар кӣ байтро азёд карда бошад, даст бардорад.
Ҳеҷ яке аз хонандаҳо натавониста буданд, ки байтро ҳифз кунанд. Танҳо касе, ки дасти худро боло бурд ва байтро қироат намуд, ҳамон хонандаи дирӯз мавриди тамасхури ҳамсолонаш қароргирифта буд. Ҳамсабақонаш аз ин, ки ӯ тавонистааст дар ин муддати кӯтоҳ байтро азёд кунад, моту мабҳут шуданд. Муаллим ӯро таҳсину офарин гуфт ва аз ҳамсабақонаш хоҳиш кард, ки барои ӯ каф бизананд.
Дар тӯли ин як моҳ муаллими навомада ҳар рӯз ин корро такрор менамуд ва аз шогирдонаш мехост, ки он ҳамсабақи худро ташвиқ кунанд ва мавриди лутфу муҳаббаташон қарор диҳанд.
Дигар худи шогирд ҳам намехост монанди гузашта мавҷуди беаҳамият бошад. Чун мустақилона низ кӯшишҳои зиёд ба харҷ дод, он сол соли таҳсилро бо баҳои хуб ба анҷом расонд. Ҳамин гуна мактабро хатм намуду вориди донишгоҳ гардид ва бо мурури замон ба унвони доктори илм муваффақ шуд. Ҳоло ӯ аз беҳтарин мутахассисони пайванди ҷигар дар ҷаҳон мебошад.
Таҳияи Абдурашид САФАРОВ,
ноҳияи Фархор
Баёни ақида (0) Санаи нашр: 03.10.2018 №: 194 Мутолиа карданд: 4698
