ҳуқуқ
СУҒД. ШУМОРАИ ИХТИЁРИЁН ДАР САФИ АРТИШИ МИЛЛӢ МЕАФЗОЯД
Имрӯзҳо дар саросари кишвар, аз ҷумла вилояти Суғд, маъракаи даъвати ҷавонон ба сафи Қувваҳои Мусаллаҳи Ҷумҳурии Тоҷикистон муташаккилона ҷараён дорад.
Тавре аз хадамоти матбуоти раиси вилоят хабар доданд, сол ба сол шумораи ҷавонони ихтиёрӣ барои адои хизмат дар сафи Артиши миллӣ меафзояд ва, аллакай, як қатор шаҳру навоҳии вилоят нақшаи даъватро иҷро намуданд.
АШТ
Ноҳияи Ашт дар рӯзҳои нахустини даъват нақшаи пешбинишударо 60 дарсад иҷро намуд ва 100 нафар ихтиёрӣ барои адои хизмати ҳарбӣ ба сафи Қувваҳои Мусаллаҳ сафарбар гардид.
Ба муносибати гусели даъватшавандагон дар назди Театри мусиқӣ-драмавии ба номи Маҳмудҷон Воҳидов ҷамъомади тантанавӣ доир шуд. Раиси ноҳия Зариф Мирдадо зимни суханронӣ иброз дошт, ки имрӯзҳо дар сафи Артиши миллии кишвар ҳазорон ҷавонони ватандӯст сарбаландона хизмат карда, бо неруи худ дар таҳкими сулҳу суботи кишвар ҳиссаи муносиб мегузоранд.
СПИТАМЕН
Дар варзишгоҳи марказии «Чашма» - и ноҳияи Спитамен маъракаи гусели ҷавонон баргузор шуд ва қариб 170 нафар ихтиёрӣ ба ҳифзи марзу буми Ватан рафт.
Тибқи иттилои манбаъ, соли ҷорӣ нахустин маротиба дар таърих нақшаи даъвати ҷавонон ба сафи Артиши миллӣ иҷро гардид.
ШАҲРИСТОН
Ноҳияи Шаҳристон низ дар рӯзҳои аввал нақшаро 104 дарсад иҷро кард.
Ба муносибати гусели даъватшавандагон дар маркази ноҳия ҷамъомад доир гардида, таъкид шуд, ки хизмат ба Ватан – Модар на танҳо уҳдадории шаҳрвандӣ, балки қарзи виҷдониву имонӣ ва вазифаи боифтихори ҳар як ҷавонмарди сарзамин аст.
КОНИБОДОМ
Аз шаҳри Конибодом гурӯҳи аввалини ихтиёриён, ки беш аз 100 нафарро ташкил медод, ба сафи Қувваҳои Мусаллаҳ шомил шуд.
Дар майдони «Оташи абадӣ» ба муносибати гусели ихтиёриён чорабинии идона баргузор гардид. Зимни он, раиси шаҳр Ғайбулло Боҳирӣ иброз дошт, ки Артиши миллӣ яке аз рукнҳои муҳимтарини давлатдорӣ ва сипари боэътимод маҳсуб меёбад. Маҳз ба шарофати хизмати шуҷоатмандонаи хизматчиёни ҳарбӣ мардуми Тоҷикистон имрӯз дар вазъи орому осуда зиндагӣ доранд.
Даъватшавандагон ба иштирокчиёни ҷамъомад ва дар симои онҳо ба тамоми мардуми диёр ваъда доданд, ки ҳар як ваҷаб хоки сарзамини аҷдодиро бо матонату мардонагӣ ҳифз хоҳанд кард.
Бахтовар КАРИМ, “Ҷумҳурият”
Баёни ақида (0) Санаи нашр: 12.10.2018 №: 201 Мутолиа карданд: 883
