туризм
АСПСАВОРӢ СОҲАИ ОЯНДАДОРИ САЙЁҲӢ
Раёсати ҷавонон ва варзиши дастгоҳи раиси шаҳри Душанбе ҳамроҳ бо Федератсияи ҷумҳуриявии “Кокбору ва пойга” давоми нуҳ моҳи соли ҷорӣ 6 пойгаи аспдавонӣ бо иштироки 650 сар аспи зоти тоҷикӣ ва англисӣ баргузор намуд. Иқдоми мазкур ба муносибати таҷлили сазовори ҷашнҳои миллӣ ва эълон гардидани Соли рушди сайёҳӣ ва ҳунарҳои мардумӣ роҳандозӣ шуд.
Ҳабибулло Амирбекзода, муовини якуми раиси Кумитаи рушди сайёҳии назди Ҳукумати Ҷумҳурии Тоҷикистон, иброз намуд, ки варзиши аспсаворӣ яке аз соҳаҳои ояндадори рушди сайёҳӣ ба ҳисоб рафта, соли 2018 барои ҷалби бештари сайёҳони хориҷӣ ва дӯстдорони асп чорабиниҳои зиёд доир шуданд. Дар кишвари мо аз рӯйи расму оин ва анъанаҳои хос, аз ҷумла таҷлили Ҷашни Наврӯз, бозиҳои миллии бузкашию аспдавонӣ маъмуланд ва онҳо ба варзиши асп алоқаи зич доранд. Барои пешрафти ин намуди варзиш дар шаҳру вилоятҳо, аз ҷумла шаҳрҳои Душанбе ва Хуҷанд, нуқтаҳои аспсаворӣ ташкил ёфтанд. Аспсаворӣ дар атрофи “Наврӯзгоҳи пойтахт” бо арзиши 25 сомонӣ дар байни сайёҳони дохилию хориҷӣ маҳбубият пайдо кардааст, ки нишони пешрафти соҳа аст. Истифода аз чунин хизматрасонӣ ва дигар имкониятҳои васеъ, ба монанди фойтуни асп, барои хидмат дар хонаҳои ақди никоҳ, намоишҳои сиркӣ ва амсоли инҳо манфиатоваранд.
Дар замони муосир аспсаворӣ аз варзишҳои маъмул ва сердаромад ба ҳисоб меравад. Аз ин лиҳоз, хоҷагиҳои деҳқонии асппарвар, бо дарки аҳамияти рушди соҳа, ба парвариши аспҳои пойгавӣ бештар таваҷҷуҳ доранд.
Иброҳим Мирзозода, сардори раёсати ҷавонон ва варзиши дастгоҳи раиси шаҳри Душанбе, иштироки фаъол ва сазовори ҷойҳои ифтихорӣ гардидани аспҳои зоти тоҷикиро дар мусобиқаҳои байналмилалии Қазоқистон, Қирғизистон, Туркманистон ва Ӯзбекистон далели пешравии соҳа арзёбӣ кард. Ғолибияти чандкаратаи чобуксаворон - Анушервони Рустам, Фирдавс Саломов, Манучеҳр Шарофиддинов, Хуршед Сатторов, Ҷонибек Юлдошов, Абдураҳим Давлатов натиҷаи заҳматҳои зиёди худи онҳо ва хоҷагиҳои асппарвар мебошад. Умуман, рушди варзиши аспсаворӣ (хусусан намуди классикии он дар барномаи бозиҳои олимпӣ дохилгардида, гузаштани монеаҳо, варзиши асп - лижаронӣ, шикор бо асп ва амсоли инҳо) дар пешрафти соҳаи асппарварӣ, рушди чорводорӣ, саноати гӯшту шир, соҳаҳои тиб ва сайёҳӣ бо назардошти бунёди биноҳои нави аспнигоҳдорӣ, кушодани курсҳои омӯзишӣ ва нуқтаҳои савдою хизматрасонӣ, ки дар навбати худ ба таъсиси ҷойҳои нави корӣ имкон медиҳад, афзалиятнок аст. Гузашта аз ин, варзиши асп дар ҷараёни пешрафти техника ва технология, асосан, барои беҳтар шудани муносибати инсон бо табиат хеле муҳим аст.
О. ВАФОБЕК, “Ҷумҳурият”
Баёни ақида (0) Санаи нашр: 24.10.2018 №: 207 Мутолиа карданд: 1074
