номаҳо
МАЪЮБИ ГУРӮҲИ II: "НОМАИ МАРО ЧОП КУНЕД!"
Ман маъюби гурӯҳи дуюм ва ҳам маъюби садамаи Чернобилам. Бемориамро баъди ташхис мутахассисон коксоартрози дутарафа муайян кардаанд. Онҳо тавсия доданд, ки бояд ҳатман ҷарроҳӣ бишавам.
Ба ҳар ҷойи зарурӣ, ки оид ба ин масъала муроҷиат кардам, натиҷае набахшид. Ҳамоно аз ман барои амалиёт ё худ ҷарроҳӣ маблағ талаб намуданд. Мутаассифона, мани маъюб миқдори пули заруриро пайдо карда наметавонистам. Оре, агарчи медонистанду медонам, ки табобати мо барин маъюбон ройгон мебошад. Чӣ гуна бифаҳмам? Гуфтаву навишта дигар асту амал дигар? Охир, ман ду сол боз борҳо ба Вазорати тандурустӣ ва ҳифзи иҷтимоии аҳолӣ низ муроҷиат кардам. Посух гирифтам, ки барои ҷарроҳии Шумо пули калон лозим асту мо ин миқдор пулро ҷудо намуда наметавонем.
Ғамгину ҳайратзадаам. Боз ба куҷо муроҷиат бинамоям? Чӣ кор бикунам? Ҳол он ки мани бемор дар қайди маркази саломатии ноҳия мебошам. Дар иҷрои ин кор бояд ба ман табиби оилавӣ ва марказ ёрӣ бирасонад. Инчунин, аз ранҷу азоби навбатпоӣ, муроҷиат дар идораҳои болоӣ ва дигар ҷойҳои зарурӣ бираҳонанд. Мисли ин аст, ки маро ҳеҷ кас намефаҳмад. Не, чӣ гуна бифаҳманд? Аз ҳолу ранҷам касе бохабар буда метавонад, ки монанди ман аз дардҳо пайваста ранҷ мебарад, шабро бо бедорӣ саҳар мекунад. Магар осон аст бо такя ба ду асобағал роҳ рафтан?
Зарур шуморидам, ки ба гӯшаи «Шаҳрванд» - и рӯзномаи "Ҷумҳурият" бо изҳори дарди дил муроҷиат бикунам. Бо такяи асобағалҳо ба ин идора омадам. Таъкид намудам, ки номаамро ба дасти чоп бидиҳанд. Шояд масъулон андаке ҳам бошад, ба ин масъала таваҷҷуҳ бикунанд ва агар имконият дошта бошанд, тадбир биандешанд.
Қурбоналӣ ЮСУФОВ, шаҳри Душанбе, ноҳияи Фирдавсӣ,
кӯчаи Н. Қаробоев, хонаи 7, ҳуҷраи 12
Баёни ақида (0) Санаи нашр: 29.10.2018 №: 210 Мутолиа карданд: 1238
