фарҳанг
МУЪҶИЗА. БАРДОШТ АЗ ТАМОШОИ БАРНОМАИ КОНСЕРТИИ ХОСИЯТ ОЛИМОВА
Чанде пеш дар барномаи консертии Хосият Олимова, фортепианонавози номвари тоҷик, дорандаи ҷоизаҳои байналмилалӣ ширкат варзидем ва бори дигар боварамон бар он афзуд, ки санъат ва ҳунар марзу миллат надорад ва яксон дилҳоро ба таҳрик меорад.
Хосият хосияти мусиқии асилро барвақт дарк кардааст. Ӯ медонад, ки ҳар як асари санъат бояд аз дил чу насим оҳистаю накҳатбор бархезад ва дилҳои мардумро ангезаи ишқу муҳаббат бахшад.
Барномаи эҷодӣ дар Консерваторияи миллии Тоҷикистон ба номи Талабхӯҷа Сатторов гузашт. Хуҷастагии консерт аз он буд, ки дар он меҳмонон аз кишварҳои хориҷӣ иштирок доштанд. Онҳо ҳама ба хотири истеъдоди як бонуи ҳунарманди тоҷик роҳҳои дарозро тай карда омаданд.
Хосият бо ангуштони наҳифу нармаш рӯи тугмаҳои сиёҳу сафеди роял мусиқӣ менавишт. Ангор, ангуштонаш хома буданду роял коғази ӯ. Ин муъҷиза аст, вақте аз ҳаракатҳои мавзуну муназзами ангуштони инсон мусиқӣ метаровад. Чун оби шаффофи чашмаҳо ҷорӣ шуда, дилҳоро шодоб мекунад.
Ба тамошобинон назар мекардаму медидам, ки аксарият чашмони худро пӯшида, гӯш ба мусиқии дилнавоз медоданд. Ӯ нахуст мусиқии дилнишинеро аз эҷоди худаш навохт ва баъдан бо оркестри калон асарҳои мондагори Бетховен ва Мотсартро бо санъату маҳорати воло иҷро намуд. Хориҷиҳо ҳама масти мусиқӣ шуданд. Дар Тоҷикистон гӯш кардани чунин осори классикии ҷаҳон барои онҳо завқу кайфияти дигар дошт, албатта.
Аҷиб аст, ки чанде аз бонуҳои зебои рус ашк рехта, рӯмолчаҳои худро аз ҷайб бароварданд. Бале, ҳунари асил бояд хандонад, гирёнад, хотираҳои талху ширинро бедор намояд ва ниҳоят аз инсон будани инсон ҳар замон ёдовар шавад.
Дар ҷамъбасти консерт ректори Консерваторияи миллӣ, профессор Фароғат Азизӣ аз байни тамошогарон бархоста, Хосиятро ба оғӯш кашид. Ҳаяҷону эҳсоси Хосиятро ҳадду канор набуд. Дӯстони русу амрикоию аврупоияш низ ӯро хуҷастабодӣ карданд. Ҳунарманди мо бо ҳиссу ҳаяҷон, табассуми хос ва одобу тамкини тоҷикона ҳарф мезад, гоҳ инглисиву гоҳ русӣ ва гоҳ шӯхиҳое бо забони фаронсавӣ армуғон карда, меҳмонони раҳдурашро хайрамақдам мегуфт.
Мухлисону шогирдон ва кормандони эҷодии Консерваторияи миллӣ ӯро ҳалқапеч карда, ба суҳбат мекашиданд. Чашмони Хосият дурахше дошт, ки ба андешаи мо, кам иттифоқ меафтод чунин шодии беканор.
Ӯ гӯё ҳамон рӯз гулдаста не, зару зевар, табассуму кафкӯбӣ не, тиллову нуқра, табрику шодбошӣ не, лаълу гуҳар ёфт. Барои ӯ бас буд ҳамин самимияту дардошоноии мухлисони ҳақиқии мусиқӣ…
Бузургмеҳри БАҲОДУР,
«Ҷумҳурият»
Баёни ақида (0) Санаи нашр: 31.10.2018 №: 212 Мутолиа карданд: 897
