фарҳанг
15 – СОЛАГИИ КОНСЕРВАТОРИЯИ МИЛЛӢ ТАҶЛИЛ ГАРДИД
Аз таъсиси ин таълимгоҳи ҳунарӣ 15 сол пур шуд. Маҳз Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба хотири рушди мусиқии касбиву миллӣ ва тарбияи мутахассисони варзидаи соҳа тамоми имконоти заруриро барои бунёд ва фаъолияти он дар кӯтоҳтарин фурсат фароҳам овард. Нахустин ректори ин даргоҳи маърифату ҳунар шодравон Талабхӯҷа Сатторов, композитор, Арбоби ҳунари Тоҷикистон, барандаи Ҷоизаи давлатии Ҷумҳурии Тоҷикистон ба номи Абуабдуллоҳи Рӯдакӣ, бо ҷалби беҳтарин мутахассисон таълиму тадрис ва тамринро дар сатҳи баланди касбӣ ба роҳ монд.
Пас аз марг ба хотири заҳматҳои шабонарӯзӣ ва гиромидошташ ин муассисаро ба номи ӯ гузоштанд. Воқеан, дар андак муддати фаъолияташ дар тайёр кардани мутахассисон саъю кӯшиши зиёд ба харҷ дод. Бо таъсиси озмунҳои байналмилалии ҳунарӣ бузургтарину шуҳратмандтарин шахсиятҳои ҷаҳониро барои рушди ҳунар, сайқали маҳорати соҳибистеъдодҳо даъват менамуд. Баргузории дарсҳои маҳорат аз ҷониби композиторон, навозандагони вертуозӣ, сарояндагон, донандагони назарияи мусиқӣ таъсири мусбати худро ба наслҳои нави ҳунарпешагони миллӣ гузоштанд. Фароғат Азизӣ, ректори Консерваторияи миллии Тоҷикистон ба номи Талабхӯҷа Сатторов, доктори илми санъатшиносӣ, профессор, аз ин ҳама хидматҳои нахустин сарвари таълимгоҳ дар мизи мудаввар, зимни сухани ифтитоҳӣ ёдовар шуд.
Муҳаққиқони соҳа Д. Латифов, Л. Назарова, Ф. Улмасов, Д. Ҳакимова, М. Достиев, Х. Низомов, А. Мӯсоев, Қ. Ҳикматов ва дигарон оид ба паҳлуҳои гуногуни ҳаёту фаъолияти ин композитори маъруф, сарвари кордону дилсӯз баромад намуданд.
Оид ба талқиноти асарҳои Т. Сатторов профессор Дилбар Ҳакимова дарси маҳорат гузашт.
Бегоҳӣ ин чорабинии фарҳангӣ бо баргузории консерти идона аз рӯи асарҳои ин композитор, нахустин ректори Консерваторияи миллӣ ҷамъбаст гардид.
Таҷлили ин санаи фархунда бори дигар собит сохт, ки армонҳои Талабхӯҷа Сатторов бароварда шуданд ва муассисаи таълимию ҳунарӣ фаъолияти пурсамар дорад.
Абдулқодири РАҲИМ,
«Ҷумҳурият»
Баёни ақида (0) Санаи нашр: 01.11.2018 №: 213 Мутолиа карданд: 904
