порлумон
ВОЛОИЯТИ ҚОНУН. БАРГУЗОРИИ ФОРУМИ ЧОРУМ
Бахшида ба 24 - умин солгарди Конститутсияи Ҷумҳурии Тоҷикистон дар Китобхонаи миллӣ Форуми чоруми миллӣ оид ба волоияти қонун дар Ҷумҳурии Тоҷикистон баргузор гардид. Дар кори форум намояндагони Дастгоҳи иҷроияи Президенти Ҷумҳурии Тоҷикистон, Маҷлиси намояндагони Маҷлиси Олӣ, роҳбарияти Вазорати адлия, Суди конститутсионӣ, Суди Олӣ, Суди Олии иқтисодӣ, роҳбарон ва намояндагони вазорату идораҳои дахлдор, ҳуқуқшиносон, ҷомеаи шаҳрвандӣ ва ташкилотҳои байналмилалӣ иштирок намуданд.
Шоҳмурод Рустам, вазири адлияи Ҷумҳурии Тоҷикистон, зимни ифтитоҳи форуми мазкур таъкид намуд, ки ҳанӯз дар солҳои аввали соҳибистиқлолӣ таҳти роҳбарии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва бо азму иродаи якдилонаи шаҳрвандони кишвар Конститутсияи Ҷумҳурии Тоҷикистон қабул карда шуд. Ин рӯйдод дар таърихи миллати тоҷик воқеаи нодиру фараҳбахш маҳсуб шуда, барои бунёди давлати демокративу ҳуқуқбунёд, ташкили сохтори нави ҳокимияти давлатӣ, муайян намудани ҳадафҳо ва самтҳои сиёсати дохилӣ ва хориҷии давлат нақши босазо бозид.
Эмомалӣ Насриддинзода, раиси Кумитаи Маҷлиси намояндагони Маҷлиси Олии Ҷумҳурии Тоҷикистон оид ба қонунгузорӣ ва ҳуқуқи инсон, зикр кард, ки давоми солҳои соҳибистиқлолӣ дар ҷумҳурӣ асосҳои муосири фаъолияти қонунгузорӣ ташаккул ёфта, дар як муддати кӯтоҳи таърихӣ беш аз 360 қонун дар соҳаҳои мухталифи қонунгузорӣ, аз қабили гражданӣ, соҳибкорӣ, оилавӣ, меҳнат, экологӣ, молия, маъмурию ҷиноятӣ, мурофиаи гражданӣ, таҳия ва аз лиҳози меъёрӣ таъмин гардиданд.
Ҳамчунин, Пратибҳа Меҳта, ҳамоҳангсози доимии СММ ва намояндаи доимии Барномаи рушди СММ дар Тоҷикистон, Урс Шмид, сафири Швейтсария дар Қазоқистон ва Тоҷикистон, зимни ифтитоҳи ҳамоиш баромад карданд.
Дар Форуми миллӣ масъалаҳо оид ба рушди қонунгузорӣ, мушкилӣ ва муаммоҳои соҳаи меъёрэҷодкунӣ бо назардошти муқаррароти Консепсияи сиёсати ҳуқуқии Ҷумҳурии Тоҷикистон, самтҳои асосии ислоҳоти судӣ - ҳуқуқӣ дар замони муосир, муқовимат ба экстремизм ва терроризм, мушкилот ва дурнамо, ҳуқуқи соҳибкорӣ ва сайёҳӣ заминаҳои бунёдии таҳкимбахшандаи иқтисодиёт, иҷрои уҳдадориҳои байналмилалии Ҷумҳурии Тоҷикистон дар самти ҳуқуқи инсон ва татбиқи ҳадафҳои рушди устувор ва воситаҳои алтернативии ҳалли баҳсҳои тиҷоратӣ, муаммоҳо ва дурнамо мавриди баррасӣ қарор гирифтанд.
Мунаввари САФАР,
«Ҷумҳурият»
Баёни ақида (0) Санаи нашр: 05.11.2018 №: 215 Мутолиа карданд: 1667
