фарҳанг
ДАЙРИ БУДДОӢ ДАР НОҲИЯИ ХУРОСОН
Дар деҳаи Субҳи ноҳияи Хуросон, дар ҳудуди хоҷагии деҳқонии Асадулло, мавзеи нави таърихӣ – дайри буддоӣ ёфт шуд. Дар бораи он истиқоматкунандаи ҳамин деҳа, омӯзгори муассисаи таҳсилоти миёнаи умумии № 3 Элёр Ахметов ба Институти таърих, бостоншиносӣ ва мардумшиносии Академияи илмҳои кишвар хабар додааст.
- Пас аз расидани хабар мо як гурӯҳ бостоншиносон ба ноҳия сафар намуда, аз ин мавзеъ дидан кардем. Маълум шуд, ки мавзеъ воқеан ҳам, макони таърихист, - мегӯяд Саидмурод Бобомуллоев, директори Осорхонаи миллии бостонии Тоҷикистон.
Бино ба иттилои ӯ, дайри буддоии бозёфтшуда дар зери замин буда, ба давраи Ҳайтолиён (асрҳои 5 – 6) мутааллиқ аст. Мавзеи мазкур ба хонаҳои зеризаминии даври буддоӣ монанд аст. Дохили он сангин буда, сақфаш гунбазӣ аст. Аз боло равзана дошта, он аслан барои рӯшан намудани дохили бино хидмат менамояд. Дохили бино холӣ буда, мардум он ҷо аслан барои ибодат мерафтанд.
Дар Тоҷикистон дайрҳои зиёди таърихӣ мавҷуд буданд. Аммо онҳо бо гузашти солҳо хароб гашта, то замони мо танҳо баъзеашон расидаанд, ки дайри буддоии бозёфтшуда аз зумраи онҳост. Аз дигар дайрҳои буддоӣ бо он тафовут дорад, ки он хеле зебо ва мустаҳкам сохта шудааст. Дар ин мавзеъ корҳои ҳафриётӣ идома хоҳанд ёфт. Ҳафриёти минбаъда имкон медиҳад, ки дар бораи ин мавзеи таърихӣ иттилои бештар пайдо намоем.
- Эҳёи ёдгориҳои таърихию фарҳангӣ ва меъморӣ баҳри баланд бардоштани рӯҳияи ватандӯстӣ, худогоҳию хештаншиносӣ ва дастрас намудани офаридаҳои таъриху фарҳангии халқи тоҷик ба ҷаҳониён хидмат мекунад. Ба ин хотир, дар ин самт мо бояд корҳои хубтару бузургтареро анҷом диҳем. Зеро ҳанӯз ёдгориҳои нуҳуфтаву таҳқиқношудаи зиёде дорем ва омӯзиши ҳамаҷонибаи онҳо имкон медиҳанд, ки дар таърихи халқи тоҷик саҳифаи нав боз гардад, - мегӯяд С. Бобомуллоев.
Фарзона ФАЙЗАЛӢ,
“Ҷумҳурият”
Баёни ақида (0) Санаи нашр: 05.11.2018 №: 215 Мутолиа карданд: 852
