порлумон
ҚОНУНГУЗОРӢ ҲИФЗИ САРВАТҲОИ ТАЪРИХИЮ ФАРҲАНГИРО БА ТАНЗИМ МЕДАРОРАД
Тибқи маълумоти расмӣ дар соли 2017 ва нуҳ моҳи соли ҷорӣ 14 ҳолати интиқоли ғайриқонунии сарватҳои таърихию фарҳангӣ ошкор ва сабт гардидааст. Вобаста ба ин, 13 парвандаи ҷиноятӣ ва як парвандаи ҳуқуқвайронкунии маъмурӣ оғоз карда шуд.
Дар парлумони кишвар ҷиҳати пешгирии чунин амалҳои номатлуб Қонуни Ҷумҳурии Тоҷикистон «Дар бораи берун баровардан ва ворид намудани сарватҳои таърихию фарҳангӣ» дар таҳрири нав ба тасвиб расид.
Ҷаббор Аҳмадов, вакили парлумон, зимни баррасии лоиҳа иброз дошт, ки он бо мақсади амалӣ намудани дастуру супоришҳои Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати такмили фаъолияти қонунгузорӣ, бартараф кардани мухолифати байни қонунҳо, беҳтар намудани сифат ва самаранокии онҳо, ҳамчунин, густариши робитаҳои фарҳангии Ҷумҳурии Тоҷикистон бо дигар давлатҳо таҳия гардидааст.
Зикр шуд, ки қонуни амалкунанда ҳанӯз соли 2001 қабул гардида, таҷрибаи амалӣ намудани он, таҳлили вазъ дар ин ҷода ва талаботи муосир дар ин раванд заруратро ба миён овард, ки дар лоиҳа якчанд моддаҳои нав ворид карда шаванд. Пешгирӣ намудани ҳолатҳои ғайриқонунии аз ҳудуди Ҷумҳурии Тоҷикистон берун баровардани сарватҳои таърихию фарҳангӣ яке аз дигар омилҳо ба ҳисоб меравад. Лоиҳа дар таҳрири нав асосҳои ҳуқуқӣ ва ташкилии раванди берун баровардан ва ворид намудани сарватҳои таърихию фарҳангиро муайян намуда, ба ҳифзи ин мероси гаронбаҳо равона гардидааст. Тибқи он раванди танзими давлатии берун баровардан ва ворид намудани сарватҳои таърихию фарҳангӣ муқаррар гардида, бо мақсади мусоидат намудан ба танзими меъёрии ҳуқуқии масъалаҳо оид ба берун баровардани ин сарватҳо таъсиси шӯрои вижа оид ба ҳифз ва мубодилаи байналмилалии сарватҳои таърихию фарҳангӣ ва гузарондани экспертизаи давлатӣ пешбинӣ шудаанд.
С. МУНАВВАР, «Ҷумҳурият»
Баёни ақида (0) Санаи нашр: 05.11.2018 №: 215 Мутолиа карданд: 1708
