ҳуқуқ
ЭҲТИРОМИ КОНСТИТУТСИЯ ЭҲТИРОМИ МИЛЛАТ АСТ
Дар зарфи 27 соли Истиқлолияти давлатӣ бо тақозои марҳилаҳои нав дар низоми давлатдорӣ ва рушди кишвар зарурат пеш омад, ки ба Конститутсияи Ҷумҳурии Тоҷикистон тағйиру иловаҳо ворид карда шаванд. Аз ҷумла, бо мақсади татбиқи ҳадафҳои минбаъдаи рушди низоми сиёсиву ҳуқуқӣ, иқтисодӣ, фарҳангию иҷтимоӣ 22 майи соли 2016 ба воситаи раъйпурсии умумихалқӣ ба ин санади олии ҳуқуқӣ тағйиру иловаҳо ворид шуданд.
Тағйиру иловаҳои воридшуда, дар баробари дигар бахшҳо ба татбиқи сиёсати давлатии ҷавонон такони нав бахшида, иштироки фаъолонаи онҳоро дар идораи умури давлатдорӣ бештар кард. Зеро имтиёзҳои дар сатҳи меъёрҳои Конститутсия пешбинӣ шуда, имконият фароҳам овард, ки ҷавонони донишманду соҳибмаърифат ба вазифаҳои муҳими давлатию ҷамъиятӣ пешбарӣ шаванд.
Ҳоло дар баробари ҳокимияти иҷроия, инчунин, иштирок ва пешбарии номзадии ҷавонон дар зинаҳои ҳокимияти давлатӣ, аз ҷумла қонунгузор ва судӣ бештар гардида, сафи ҷавонони пурмасъулу кордон барои фаъолият дар ин сохторҳо афзудааст. Зимнан, тибқи боби 3 моддаи 49 ва боби 8 моддаҳои 85, 89 Конститутсияи Ҷумҳурии Тоҷикистон ҷавонон ҳуқуқ доранд, номзадии худро то ба интихоб шудан ба вакили Маҷлиси намояндагон, аъзои Маҷлиси миллӣ ва ҳокимияти судӣ пешбарӣ намоянд. Аз ҷумла, мутобиқи моддаи 85 Конститутсия ҷавонон аз 30 - солагӣ ҳуқуқ доранд, ба вазифаи судяҳои Суди Олӣ, Суди Олии иқтисодӣ, судҳои Вилояти Мухтори Кӯҳистони Бадахшон, вилоят ва шаҳри Душанбе интихоб ё таъйин шаванд. Инчунин, дар асоси талаботи моддаи 89 Конститутсия барои интихоб гардидани шахс ба вазифаи судяи Суди конститутсионӣ низ чунин синну сол пешбинӣ гардидааст. Бар асоси банди 2 моддаи 85 - и Конститутсия бошад, ҷавонон аз 25 - солагӣ имкон доранд, судяҳои судҳои шаҳр ва ноҳия, суди ҳарбӣ, судҳои иқтисодӣ шаванд. Дар ин робита, ҷавононро зарур аст, масъулияти бештар зоҳир намуда, сазовори боварии давлат ва ҷомеа бошанд.
Табиист, ки эҳтироми Конститутсияи кишвар, ин эҳтироми давлату миллат буда, тавассути эҳтиром ва риояи дақиқи меъёрҳои он мо шаҳрвандон қарзи шаҳрвандии худро сарбаландона иҷро хоҳем кард. Бинобар ин, риояи Конститутсия ва таъмини волоияти қонун вазифаи ҳамаи мақомоти давлатӣ, ҷомеаи шаҳрвандӣ ва ҳар як фарди ватандӯст мебошад.
Эмомалӣ НАБИЕВ, омӯзгори ДДБ ба номи Носири Хусрав
Баёни ақида (0) Санаи нашр: 06.11.2018 №: 216 Мутолиа карданд: 1403
