ҳуқуқ
САНАДИ ТАҚДИРСОЗ
Конститутсияи Ҷумҳурии Тоҷикистон дар ҷаҳон яке аз беҳтарин конститутсияҳо ҳисобида шудааст.
Қабули ин санади олии ҳуқуқӣ давра ба давра рушди соҳаҳои гуногуни хоҷагии халқ ва сатҳи некуаҳволии зиндагии мардуми Тоҷикистонро тадриҷан баланд гардонд.
Татбиқи бомароми ҳадафҳои созандагии пешгирифтаи давлат ва Ҳукумат дар як муддати кӯтоҳ бемайлон баланд гардид. Дар асоси ислоҳоти ҳуқуқӣ тамоми қонунгузории давлат тавассути қабули қонунҳои муҳими ба талаботи замони муосир ҷавобан такмил ёфта, ба талаботи конститутсия мутобиқ гардонда шудаанд.
Ҳамин тавр, дар рӯҳияи эҳтирому риояи қонун барои рушду такомул ёфтани ҳар фарди ҷомеа заминаи мусоиди ҳуқуқӣ фароҳам омад. Вобаста ба талаботи муносибати ҷамъиятии рушдёбанда, ташаккули низоми ҳуқуқӣ ва дигар омилҳои муҳим солҳои 1999, 2003 ва 2016 тавассути раъйпурсии умумихалқӣ дар фазои озоду демократӣ ба Конститутсия тағйиру иловаҳо ворид гардиданд.
Конститутсия эҳтирому риояи ҳифзи ҳуқуқии озодиҳои инсон ва шаҳрванд, таъмини амният ва суботи устувори ҷомеа, фароҳам овардани шароити мусоид барои зиндагии арзанда ва инкишофи озодонаи ҳар як шахсро таъмин менамояд. Конститутсияи Ҷумҳурии Тоҷикистон ҳамаи муносибатҳои ҷамъиятиеро, ки дар кишвар ба вуҷуд меоянд, дар бар мегирад. Дар мустаҳкам намудани он ҳамаи соҳаҳои ҳуқуқӣ ва қонунгузорӣ иштирок менамоянд.
Асосҳои сохтори конститутсионии кишвар мувофиқи ин санади олӣ аз бандҳои зерин иборат аст:
1. Низоми сиёсии ҷамъият.
2. Низоми иқтисодӣ.
3. Асосҳои сохти иҷтимоӣ ва маданӣ.
Дар моддаи 1 - и Конститутсия омадааст:
"Ҷумҳурии Тоҷикистон, давлати соҳибихтиёр, демократӣ, ҳуқуқбунёд, дунявӣ ва ягона мебошад".
Ҳамин аст, ки имрӯз Тоҷикистон чун узви фаъоли ҷомеаи ҷаҳонӣ эътироф гардидааст. Зеро Конститутсия бори нахуст Тоҷикистонро ба ҷаҳониён чун давлати соҳибихтиёр, демократӣ, ҳуқуқбунёд ва дунявӣ муаррифӣ карда, забони тоҷикиро ҳамчун забони давлатӣ эълон ва рамзҳои давлатиро муайян кард, ҳуқуқи озодии инсон ва шаҳрвандро арзиши олӣ ва халқро баёнгари соҳибихтиёрӣ ва сарчашмаи ягонагии ҳокимияти давлатӣ эътироф намуд.
Аз ин рӯ, ҳамаи мақомоти давлатӣ дар асоси Конститутсия фаъолияти худро ба роҳ монда, муҳофизати ҷамъият ва шаҳрвандро таъмин менамоянд.
Ш. РАҲМОНОВ,
Қ. ДАМИНОВА,
омӯзгорони Донишгоҳи давлатии Кӯлоб
ба номи Абуабдуллоҳи Рӯдакӣ
Баёни ақида (0) Санаи нашр: 06.11.2018 №: 216 Мутолиа карданд: 871
