фарҳанг
РӮЗИ ТЕАТРИ ТОҶИК ТАҶЛИЛ ШУД
Театр пайвандгари маънавии наслҳо буда, рукни муҳиму барҷастаи фарҳанги миллӣ ба ҳисоб меравад.
Эмомалӣ РАҲМОН
Шурӯъ аз соли 2000 - ум ҳамасола 7 ноябр чун Рӯзи Театри тоҷик таҷлил мегардад. Имсол дар ин рӯз, ҳамчунон, 80 - солагии Арбоби ҳунари Тоҷикистон, барандаи Ҷоизаи давлатии Тоҷикистон ба номи Абуабдуллоҳ Рӯдакӣ ва Александр Александров, профессор, композитори маъруфу маҳбуб Фаттоҳ Одина бо шукӯҳи хос дар Театри давлатии академии опера ва балети ба номи С. Айнӣ ҷашн гирифта шуд.
Орумбек Шамсиддинзода, вазири фар-ҳанги ҷумҳурӣ, бо табрики ҳунарпешагону ҳаводорони он ба ин рӯзи муборак ва санаи фархунда изҳор дошт, ки соли равон ин ду ҷашни фархунда дар арафаи мавриди истифода қарор гирифтани нахустин агрегати Неругоҳи барқи обии Роғун таҷлил мешавад. Ва ҳам афзуд, ки қабули Қонуни Ҷумҳурии Тоҷикистон «Дар бораи театр ва фаъолияти театрӣ», Барномаи рушди санъати театрӣ дар Ҷумҳурии Тоҷикистон барои солҳои 2013-2019, барои фаъолияти пурсамари театрӣ заминаи мусоидро фароҳам оварданд.
Театри тоҷик, воқеан, чун солҳои пешини даврони истиқлол дар соли равон низ бо таҳияи намоишномаҳои нав дар боло бурдани сатҳи маънавиёти мардум нақши босазо гузошт. Ҳамчунин, бо намоиши асарҳои ҷолибу пурмазмун дар хориҷи кишвар дастовардҳои ҳунарии миллатро бештару беҳтар муаррифӣ намуд.
Бо зикри фаъолияти пурсамари композитор Фаттоҳ Одина изҳор гардид, ки ӯ бо истеъдоди фавқулодаи хеш дар рушди мусиқии касбии тоҷик саҳми чашмрас гирифтааст. «Парасту», «Бузаки ҷингилапо», «Увертюраи ҷавонӣ», достони симфонии «Ленин дар Помир» (аз рӯи достони Мирсаид Миршакар), «Падарамро набаред», «Бародарам», «Ман доғ», «Фалак», «Насими кӯҳсор» аз ҷумлаи асарҳои ин композитор мебошанд.
Фаттоҳ Одина барои беш аз 10 кинофилм ва намоиши театрӣ мусиқӣ эҷод карда, муаллифи қариб 300 суруд мебошад.
Ба хотири гиромидошти ӯ ва қадрдонии заҳматҳои эҷодияш қасри навбунёду бошукӯҳи фарҳанги ноҳияи Темурмалик ба номаш гузошта шуд.
Ибодулло Машраб, Ҳунарпешаи халқии Тоҷикистон, бо табрики ҳамкасбону ҳампешагонаш шукргузорӣ аз даврони соҳибистиқлолии кишвар, сулҳу амнияти пойдор намуд, ки барои рушди соҳаи фарҳанг, аз ҷумла театр имкониятҳои мусоид фароҳам омадааст. Бо сипосгузории ин ҳама ва ғамхориву дастгирии зиёди Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, гуфт, ки мо бо шинохти рисолати шаҳрвандӣ ва ҳунарӣ бо таҳияи асарҳои баландғоя дар рушди соҳа, пешрафту тараққиёти маънавиёти мамлакат саҳми арзанда мегирем.
Ҷашнро иҷрои намоишҳои идона ва асарҳои мондагори композитор Фаттоҳ Одина шукӯҳи хос бахшиданду хотирмон намуданд.
Абдулқодири РАҲИМ, «Ҷумҳурият»
Баёни ақида (0) Санаи нашр: 09.11.2018 №: 218 Мутолиа карданд: 909
