ҳуқуқ
ҚӮШУНҲОИ САРҲАДӢ. 400 САРБОЗИ НАВ САВГАНД ЁД КАРД
10 ноябр 400 сарбози навдаъватшуда, ки барои адои хидмати ҳарбӣ ба ҷузъу томҳои Қӯшунҳои сарҳадии Кумитаи давлатии амнияти миллии Ҷумҳурии Тоҷикистон шомил шуданд, савганди ҳарбӣ ёд карданд. Маросими савгандёдкунӣ дар Маркази таълимии «Пойтахт» - и Қӯшунҳои сарҳадӣ бо ҳузури падару модарони сарбозон ва дигар меҳмонон доир гардид.
Нурулло Абдуллозода, муовини фармондеҳи Қӯшунҳои сарҳадӣ, дар назди меҳмонон ва сарбозон баромад намуда, иброз дошт, ки мубориза бар зидди ҳама гуна хатарҳои эҳтимолӣ, бахусус терроризми байналмилалӣ, экстремизми сиёсӣ ва дигар зуҳуроти номатлуб, аз ҳар як афсару сарбоз омодабошии доимии ҳарбиро тақозо намуда, ҳифзи дастовардҳои Истиқлолияти давлатӣ аз мову шумо вобастагӣ дорад. Дар ин замина, вазифаи аввалиндараҷаи ҳар як хизматчии ҳарбӣ ин садоқат ба Ватан ва савганди ҳарбӣ мебошад.
Дар назди ҷамъомадагон падару модарон низ суханронӣ карда, ба фарзандонашон хизмати софдилонаро дар ҳифзи марзу буми кишвар орзу намуда, зикр карданд, ки хизмати аскарӣ барои ҳар як ҷавон мактаби воқеии ҳаёт мебошад. Маҳмадсаид Назаров, аз ноҳияи Хуросон, зимни суҳбат иброз дошт, ки барои ман ифтихор аст, ки писари чорумамро ба сафи Қувваҳои Мусаллаҳи кишвар сафарбар мекунам. Умедворам, ки ӯ бо сари баланд аз хидмати ҳарбӣ бармегардад.
Пешниҳоди барномаи консертӣ аз ҷониби ҳунармандони ансамбли ҳарбии «Марзбон» - и Қӯшунҳои сарҳадӣ маросими савгандёдкуниро хотирмон намуд.
Маҳмуд ҶӮРАЕВ, «Ҷумҳурият»
Баёни ақида (0) Санаи нашр: 13.11.2018 №: 220 Мутолиа карданд: 884
