фарҳанг
ШАҲРИ ТУРСУНЗОДА. ОҒОЗИ НАМОИШИ ҲУНАРҲОИ ЗЕБО
Дар шаҳри Турсунзода ба ифтихори Соли рушди сайёҳӣ ва ҳунарҳои мардумӣ намоиши корҳои эҷодии донишҷӯён ва омӯзгорони Донишкадаи давлатии санъати тасвирӣ ва дизайни Тоҷикистон ба кори худ шурӯъ кард, ки то 27 ноябри соли ҷорӣ идома меёбад. Дар намоиш раиси шаҳри Турсунзода Абдуқодир Вализода, ректори Донишкадаи давлатии санъати тасвирӣ ва дизайни Тоҷикистон Ҷамшед Ғанизода, муовини вазири фарҳанги ҷумҳурӣ Музаффар Давлатзода, мутахассисони соҳа ва омӯзгорону хонандагони мактабҳои шаҳр ширкат доштанд.
ТАВАҶҶУҲИ АҲОЛИИ ШАҲР БА ҲУНАРҲОИ ЗЕБО
- Сокинони меҳнатқарини шаҳри Турсунзода дар кишвар бо ҳунармандони чирадаст, кулолони кордида, дӯзандагону мусаввирон, шоирону ромишгарони хеш шинохта шудааст. Чорабинии имрӯза таҳрики дигарест барои рушди ҳунарҳои мурдумӣ. Аз сиёсати фарҳангсолоронаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва эълон шудани Соли рушди сайёҳӣ ва ҳунарҳои мардумӣ бештар аз ҳама сокинони шаҳри мо рӯҳу илҳоми тоза гирифтанд ва бо рағбати бештар машғули корҳои дастӣ шуданд, - изҳор дошт Абдуқодир Вализода.
ҲАДАФ ВА ДУРНАМО
Бино ба гуфтаи Ҷамшед Ғанизода, намоиши мазкур як навъ ҳисоботи донишкада аз фаъолияти панҷсолааш аст. Зеро ин муассиса бо қарори Ҳукумати Ҷумҳурии Тоҷикистон соли 2013 таъсис ёфт ва имсол ба ташкилёбии он панҷ сол пур мешавад.
- Мо дар ин муддати кӯтоҳ мутахассисони баландихтисос, аз ҷумла рассомон, наққошон, тарроҳон, кандакорон, наҷҷорон, ҳайкалтарошон, гаҷкорон ва устоҳои дастикорро тарбия намуда, ба рафти корҳои ободониву созандагии кишварамон сафарбар намудем. Ҳоло нахустин хатмкунандагони он дар дохилу хориҷи кишвар нуфуз ёфтаанд ва дар муаррифии Ватанамон саҳм мегузоранд, - афзуд Ҷ. Ғанизода.
Сабаби дар шаҳри Турсунзода баргузор намудани намоиш ҳадафҳои вижаро дар пай дорад. Аввалан, дар ин шаҳр мактаби бачагонаи санъат фаъолият дошта, хонандагонаш аллакай дар чандин озмунҳои байналмилалӣ иштирок карда, ҷойҳои ифтихориро сазовор шудаанд. Дувум, шаҳр ва дар маҷмӯъ, водии Ҳисор диёри ҳунармандони чирадаст ва ҳунарҳои зебост. Роҳбарияти донишкада тавассути ин намоиш ҷалби бештари хатмкунандагони шаҳри Турсунзодаро ба муассиса ва тарбияи касбии онҳоро хостор аст.
МӮД АЗ НИГОҲИ ҶАВОНОН
Чорабинӣ бо намоиши либосҳои тозадӯхти донишҷӯён оғоз ёфт. Тарҳи бештари пироҳанҳои зебову ранга маҳсули тахайюли эҷодии донишҷӯён буданд. Онҳо дар ҳар як пироҳан вижагиҳои миллиро ҷо дода, дар баробари ин, онҳоро бо унсурҳои муосири мӯд ғанӣ гардондаанд. Ба саҳнагузорандагон низ донишҷӯён буданд ва мӯдшоуи онҳо дар тафаккури ҳозирон таассуроти мусбат гузошт. Дар он зиёда аз 50 намуди либос бори аввал рӯнамоӣ гардид.
Яке аз онҳо Турсуной Ахмедова аст. Ӯ бо вуҷуди ҷавонӣ, 5 либоси тозатарҳи хешро ба намоиш гузошт ва аз тарафи мутахассисон баҳои баланд гирифт.
Қисмати дуюми намоишро асарҳои тасвирии донишҷӯён ва корҳои дипломии онҳо ташкил медод. Бавижа, асарҳои «Бадахшон», «Баҳори бехазон», «Маросимҳои наврӯзӣ», «Дар деҳа» ва наққошиҳою гулкориҳо ба намоиш шукӯҳи дигар бахшиданд.
Бузургмеҳр БАҲОДУР, «Ҷумҳурият»
Баёни ақида (0) Санаи нашр: 21.11.2018 №: 227 Мутолиа карданд: 925
