ҳуқуқ
БУЗУРГДОШТИ ПАРЧАМ БУЗУРГДОШТИ МИЛЛАТ АСТ
Ҳар як давлати мустақил тавассути Нишон, Парчам ва Суруди Миллии он дар ҷаҳон шинохта мешавад, зеро ин рамзҳои истиқлолият ва нишонаи асосии давлатдорӣ ба шумор мераванд. Аз ин рӯ, эҳтиром ва арҷ гузоштан ба парчам маънои арҷ гузоштан ба тамоми арзишҳои миллат, аз ҷумла ниёгони тамаддун- офар ва фарҳанги миллии мо аз оғози таърих то имрӯз мебошад.
Ниёгони мо ҳазорсолаҳо таҳти парчами хеш саф кашида, Ватану миллат, номусу озодӣ, забону фарҳанг ва марзу буми аҷдодиро ҳимоя кардаанд. Яъне, Парчами давлатӣ баёнгари мавҷудияти миллати соҳибдавлати тоҷик бо тамоми ғановату асолати таърихиву фарҳангӣ ва ҳуқуқии он аст. Зимнан, рамзҳои давлатӣ, ки парчам яке аз он аст, дар давраҳои вазнини ҳаёти халқу миллатҳо воситаи муассири инъикоси якпорчагӣ ва илҳомбахши муборизаи фидокоронаи фарзандони содиқу вафодори онҳо будааст. Зеро ҳар як фарзанди вафодор ва бонангу номуси миллат гӯшаи Ватан, ҳастии халқ ва ҷовидонагии давлатдории хешро маҳз дар ҳамин рамзҳо эҳсос карда, бо ҳимояи онҳо Модар - Ватанро ҳифз менамояд.
Парафшонии парчам дар ҳар гӯшае баёнгари мавҷудияти миллат ва давлат аст. Аз ҳамин лиҳоз, боиси ифтихор аст, ки дар пештоқи бинои Созмони Милали Муттаҳид ва бинои дигар созмонҳои бонуфузи ҷаҳон, ки Тоҷикистон узви онҳо мебошад, парчами мо нурафшонӣ мекунад. Парчам ҳамчун рамзи давлатӣ роҳбалади Сарвари давлат буда, ба ифтихори дастоварду пирӯзиҳои фарзандони миллат дар майдонҳои варзишӣ баробари садо додани Суруди Миллӣ боло мешавад.
Ҷашни Рӯзи парчам - эҳтиром ба рӯҳи қаҳрамонони миллат, яъне ба онҳое, ки дар тӯли таърих барои ному нанг ва марзу буми халқи тоҷик ҷоннисориҳо намуда, забон, фарҳанг ва ҳаққи давлатдории ин миллати кӯҳанбунёдро то ба замони мо расондаанд. Яъне, ин эҳтиром ба рӯҳу равони Коваи оҳангару Куруши Кабир, Шераку Деваштич, Исмоили Сомониву Темурмалик, Рӯдакиву Фирдавсӣ ва садҳову ҳазорон абармардони гузаштаи мост.
Сайдалӣ СИРОҶИДДИН, раиси суди ноҳияи
Ҷалолиддини Балхӣ
Баёни ақида (0) Санаи нашр: 26.11.2018 №: 230 Мутолиа карданд: 884
