фарҳанг
"ЗАБОНИ МИЛЛАТ - ҲАСТИИ МИЛЛАТ". КИТОБ ВА ХУДШИНОСИИ МИЛЛӢ
Агар ба таърихи забони тоҷикӣ назар афканем, мебинем, ки ин миллати куҳанбунёду тамаддунсоз дар ҳамаи давраҳои таърихӣ пайроҳаҳои пурпечутобро тай намуда, бо нерую қудрат ва тавоноии худ то ба замони мо омада расидааст. Бояд зикр намуд, ки дар тӯли таърих фарзандони фарзонаи миллати тоҷик ҳамеша баҳри пойдории он саъю кӯшиш ба харҷ додаанд. Ҳамакнун ин рисолатро дар охири асри XX ва аввали асри XXI Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бар дӯш гирифтанд.
Суханрониҳо дар созмонҳои бонуфузи ҷаҳонӣ бо забони ноби модарӣ ва ҳам оид ба рушду такомули он, нашри осори илмию адабии классикон бо ҳуруфи кириллӣ, тарҷумаи осори адабию илмии олимони ҷаҳон, китоби «Забони миллат – ҳастии миллат» аз ҷониби Сарвари давлат Эмомалӣ Раҳмон бозгӯкунандаи ғамхорӣ ва муҳаббаташон нисбат ба забон мебошанд.
Нашри ин китоб бо таҳлилу баррасии амиқу дақиқ, нишон додани умумият ва фарқи забони тоҷикӣ аз дигар забонҳо ва ҳамзамон, ба риштаи таҳқиқ кашидани давраҳои таърихии забон бо усул ва нигориши равону оммафаҳм аз он шаҳодат медиҳад, ки муаллиф дар таълифи китоб дар баробари олимону донишмандон насли ҷавонро низ дар назар гирифтаанд. Дар ин хусус дар қисмати аввали китоб менигоранд: «Ҳадафи асосии мо он аст, ки хонандагон, махсусан насли ҷавони мо, огоҳ бошанд, ки ниёкони онҳо, сарфи назар аз номулоиматӣ ва номеҳрубониҳои таърих, то чӣ ҳад дар ҳифзи Ватан ва муқаддасоти миллӣ, махсусан забони модарии хеш кӯшиш ба харҷ дода, барои мо забони тавоноеро якҷо бо чунин осори арзишманди адабӣ ва таърихӣ ба мерос гузоштаанд».
Таҳлил ва мушоҳидаи мутахассисони Китобхонаи миллии Тоҷикистон нишон дод, ки аз соли 2016 инҷониб, китоби «Забони миллат – ҳастии миллат» яке аз китобҳои серхонандатарини ҷавонон, олимон ва муҳаққиқони забон ва таърихи миллати тоҷик мебошад.
Боварии комил дорем, ки нашри китоби аввали «Забони миллат – ҳастии миллат» заминаи хубе барои нашри китоби дуюм доир ба дигар марҳалаҳои таърихии забони тоҷикӣ хоҳад буд ва ин асар асрҳо дар авроқи худ бузургию асолати забони тоҷикӣ, созанда ва пуриқтидор будани онро ҳифз хоҳад кард.
А. АТОЕВ, унвонҷӯи Академияи
илмҳои Ҷумҳурии Тоҷикистон
Баёни ақида (0) Санаи нашр: 28.11.2018 №: 232 Мутолиа карданд: 827
