ҳуқуқ
5 ҲАЗОР СОМОНӢ ҶАРИМА БАРОИ МОНЕЪ ШУДАН БА ТАҲСИЛИ ФАРЗАНД
Мувофиқи моддаи 41 - и Конститутсияи Ҷумҳурии Тоҷикистон ҳар шахс ҳуқуқ ба таҳсилро дорад. Таълими умумии асосӣ ҳатмист. Давлат таълими умумии асосии ҳатмии ройгонро дар муассисаҳои таълимии давлатӣ кафолат медиҳад.
Мутаассифона, дар ҷомеа ҳастанд нафароне, ки на танҳо хилофи қонун амал мекунанд, балки фикри ояндаи фарзандони худро накарда, онҳоро, ҳатто, аз таҳсили ройгон, ки давлат онро кафолат додааст, боз медоранд. Чунин як ҳолатро суди ноҳияи Вахш дар маҷлиси ошкорои судӣ баррасӣ намуда, Ҳакимҷон Бураков, сокини ноҳияи Кӯшониёнро дар содир намудани ҷинояти дар моддаи 164 - и Кодекси ҷиноятии Ҷумҳурии Тоҷикистон (монеъ шудан ба гирифтани таҳсилоти ҳатмии умумии асосӣ (нуҳсола) зикршуда айбдор кард.
Тавре суд муайян намуд, Ҳакимҷон Бураков хилофи талаботи моддаи 41 - и Конститутсияи Ҷумҳурии Тоҷикистон ва санадҳои меъёрии ҳуқуқӣ вобаста ба ҳатмӣ будани таҳсилоти миёнаи умумии асосӣ амал намуда, фарзанди ноболиғаш Фирӯза Алимова, соли таваллудаш 2005, ки ҳамроҳи модараш дар деҳаи Фидокори Ҷамоати деҳоти Тоҷикободи ноҳияи Вахш истиқомат мекунад, барои гирифтани маълумоти ҳатмии умумии асосӣ (нуҳсола) монеъ шуда, ӯро дар ягон муассисаи таҳсилоти миёнаи умумӣ нагузоштааст. Дар натиҷа, ноболиғ Фирӯза Алимова, ки мебоист синфи 6-ро хатм намояд, умуман, ба мактаб нарафта, хату савод нагирифтааст. Ҳ. Бураков бо ин кирдораш ҳуқуқи конститутсионии фарзандаш Ф. Алимоваро дидаю дониста поймол намудааст.
Суд маводи парвандаи ҷиноятиро омӯхта, дархости судшаванда Ҳ. Бураков, намояндаи қонунии ҷабрдидаи ноболиғ Ш. Сафаровро дар хусуси он ки тафтишоти судии парванда бо тартиби содакардашуда гузаронда шавад, чунин шумурд, ки гарчанде судшаванда ба гуноҳаш пурра иқрор бошад ва бо тартиби соддакардашуда баррасӣ намудани тафтишоти судиро талаб дошта бошад ҳам, гунаҳгории ӯ дар содир намудани ҷиноят дар моддаи 164 - и Кодекси ҷиноятии Ҷумҳурии Тоҷикистон бо далелҳои дар парвандаи ҷиноятӣ ҷамъовардашуда пурра тасдиқи худро ёфтааст.
Бо назардошти ҳолатҳои дар боло зикргардида суд ба хулоса омад, ки кирдори судшаванда Ҳ. Бураковро бо моддаи 164-и Кодекси ҷиноятӣ, ки ҷавобгарии ҷиноятиро барои ба ҳар тарзе монеъ шудани шахси воқеӣ ба гирифтани таҳсилоти ҳатмии умумии асосӣ (нуҳсола)-ро пешбинӣ намудааст, бандубаст намояд.
Дар натиҷа, бо ҳукми суд ба Ҳакимҷон Бураков ҷазо дар намуди ҷарима ба андозаи 100 нишондиҳанда барои ҳисобҳо, баробар ба 5 000 ҳазор сомонӣ, ба фоидаи давлат таъйин карда шуд.
Саидаъзам ФАЙЗУЛЛОЗОДА,
судяи суди ноҳияи Вахш,
Лашкар ШАРИФ, “Ҷумҳурият”
Баёни ақида (0) Санаи нашр: 29.11.2018 №: 233 - 235 Мутолиа карданд: 922
