иқтисод
ЗАМИН. ҚАРОРҲОИ БЕАСОС ОШКОР ШУДАНД
Рушди кишоварзӣ ва аз ин ҳисоб болоравии сатҳи зиндагии мардуми кишвар аз муносибати оқилона ба замин вобаста аст. Ҳамин аст, ки Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни вохӯриву мулоқот бо аҳли ҷомеа, бавижа масъулони идораҳои замин, оқилона ва самаранок истифода бурдани заминро таъкид мекунанд.
Ҷиҳати иҷрои дастуру супоришҳои Пешвои муаззами миллат дар толори прокуратураи вилояти Суғд таҳти роҳбарии прокурори вилоят Ҳабибулло Воҳидов ҷаласаи ҳайати мушовара баргузор гардид, ки дар он вазъи татбиқи қонунгузорӣ дар бораи ҳифз ва самараноку оқилона ба кор бурдани замин, тафтиши қарорҳои раисони шаҳру ноҳияҳои вилоят оид ба ҷудо ва вобаста кардани қитъаҳои замин тайи 10 моҳи соли равон мавриди баррасӣ қарор дода шуд.
Прокурори вилоят зикр намуд, ки сарфи назар аз корҳои ба сомон расондаи мақомоти давлатӣ ва ваколатдор ҳанӯз ҳам ҳолатҳои истифодаи ғайримақсадноки заминҳои кишоварзӣ, фонди ҷангал ва чарогоҳ дида мешаванд. Ҳамчунин, масъалаҳои аз кишт берун мондани заминҳои корами обӣ, ҷудо накардани маблағҳо барои беҳдошти замин, муайян накардани маблағи иҷораи замин ва ба манфиати буҷети давлат ситондани он, ғайриқонунӣ ҷудо ва вобаста кардани қитъаи замин дар фаъолияти мақомотҳои марбута ва қабули қарорҳои ғайриқонунӣ аз ҷониби раисони шаҳру ноҳияҳо ба ҳадди зарурӣ ҳалли худро наёфтаанд.
Дар ҳудуди вилоят 27,3 ҳазор гектар замин дар ҳолати ғайриқаноатбахши мелиоративӣ қарор дош- та, 3249 гектар қитъаи замини кишоварзӣ дар шаҳру ноҳияҳои Истаравшан, Мастчоҳ, Ашт, Зафаробод, Деваштич, Спитамен, Конибодом, Б. Ғафуров ва Панҷакент аз кишт берун мондааст.
Дар вилоят 784,597 гектар чарогоҳ мавҷуд буда, он манбаи асосии таъмини хӯроки чорво ба ҳисоб меравад ва зиёда аз 60-65 дарсади талаботро таъмин менамояд. Бо сабаби наандешидани чораҳо барои беҳтар намудани ин заминҳо дар ҳудуди шаҳру ноҳияҳои Б. Ғафуров, Ашт, Панҷакент, Исфара, Деваштич, Шаҳристон, Истаравшан, Кӯҳистони Мастчоҳ ва Мастчоҳ зиёда аз 132 ҳазор гектари он дар ҳолати бад қарор дорад.
Ҳамчунин, 1500 гектар замини фонди ҷангали вилоят аз соли 1993 то инҷониб аз тарафи раисони шаҳру ноҳияҳо ғайриқонунӣ ба дигар субъектҳо барои ташкили хоҷагии деҳқонӣ вобаста карда шудааст.
Омӯзиши қарорҳои раисони шаҳру ноҳияҳо нишон дод, ки баъзе аз онҳо беасос ба тасвиб расидаанд. Тайи 10 моҳи соли равон ба 238 қарори раисони шаҳру ноҳияҳои Зафаробод, Айнӣ, Хуҷанд, Б. Ғафуров, Исфара, Шаҳристон, Истиқлол, Кӯҳистони Мастчоҳ, Конибодом, Истаравшан, Ҷ. Расулов, Бӯстон, Гулистон, Спитамен, Мастчоҳ, Ашт, Панҷакент ва Деваштич аз ҷониби мақомоти прокуратура эътироз оварда шуд. Аз ин 204 қарор оид ба ҷудо ва вобаста намудани қитъаи замин мебошад.
Ҳамин тавр, дар раванди санҷишҳо ҳолатҳои аз ҷониби мақомоти иҷроияи маҳаллии ҳокимияти давлатии шаҳру ноҳияҳо, идораҳои замин, обёрӣ ва беҳдошти замин, раёсатҳои кишоварзӣ, ҳифзи муҳити зист, мақомоти молия, субъектони хоҷагидор ба таври дахлдор иҷро накардани талаботи қонунгузории замин ошкор карда шуд.
Аз натиҷаи санҷишҳо мақомоти прокуратураи вилоят ба унвони раисони шаҳру ноҳияҳо ва мақомоти ваколатдор 168 пешниҳод ва 211 амр ирсол кард. Тибқи санадҳои тартибёфта 115 нафар ба ҷавобгарии интизомӣ ва 750 нафар ба ҷавобгарии маъмурӣ кашида шуд. Ба 302 санади ғайриқонунӣ вобаста ба замин эътироз оварда, 274 парвандаи ҷиноятӣ оғоз гардид. Тавассути санадҳои эътиноии прокурорӣ 3908 гектар замин ба ҳолати аввала баргардонда ва ба заминистифодабарандагони асилу қонунӣ дода шуд.
Дар ҷараёни баргузории ҷаласаи сайёр раиси вилоят Раҷаббой Аҳмадзода аз масъулони кумитаҳои идораи замин, обёрӣ ва беҳдошти замин, хоҷагии ҷангал, идораи, нозироти андоз ва дигар субъектҳои хоҷагидори вилоят ҷиҳати боз ҳам устуворона риоя намудани қонунҳои ҷории мамлакат дар робита ба замин, баҳрабардории манфиатбахши ҳар як қитъаи он пурсиш ба амал оварда, баҳри ислоҳи саривақтии камбудиҳо дастурҳои қатъӣ дод.
Ҷовиди АШТӢ, «Ҷумҳурият»
Баёни ақида (0) Санаи нашр: 29.11.2018 №: 233 - 235 Мутолиа карданд: 1009
