иқтисод
ФАРХОР. НОҲИЯ БА ФАСЛИ САРМО ОМОДА АСТ
Имрӯзҳо дар тамоми шаҳру ноҳияҳои ҷумҳурӣ ба мавсими зимистонгузаронӣ омодагии ҷиддӣ гирифта истодаанд. Дар ноҳияи Фархор баҳри татбиқи Қарори Ҳукумати Ҷумҳурии Тоҷикистон аз 27 марти соли 2018, таҳти № 147 «Дар бораи сари вақт омода намудани соҳаҳои иқтисодиёт ва иҷтимоиёти ҷумҳурӣ барои фаъолияти мунтазам ва самарабахш дар давраи тирамоҳу зимистони солҳои 2018 - 2019» тадбирҳои зарурӣ андешида шуданд.
Сулаймон Вализода, раиси ноҳия изҳор дошт, ки аллакай ҳамаи бахшҳои иҷтимоию иқтисодии мақомоти иҷроияи маҳаллии ҳокимияти давлатии ноҳия, барои зимистонгузаронӣ омодаанд. Муассисаи давлатии нигоҳдории роҳҳои автомобилгарди ноҳия баҳри нигоҳдошти 314,4 километр роҳҳои маҳаллӣ ва 95,4 километр роҳҳои дорои аҳамияти ҷумҳуриявию байналмилалӣ дар фасли сармо шароити заруриро муҳайё намудааст. Масъулони соҳа баҳри бемамоният пушти сар намудани зимистон ва вақти боридани барф ба ноҷӯриҳо мувоҷеҳ нагардидани ронандагони воситаҳои нақлиёт дар роҳҳои ноҳия тадбирҳои заруриро андешидаанд. Аз ҷумла, 263 метри мукааб маводи зиддилағжиш, 85 тонна қум, 10 тонна намак, 2400 литр сӯзишвории дизелӣ захира намуда, кормандони муассиса низ бо пойафзол ва либосҳои махсуси корӣ таъмин гардидаанд. Ҳамчунин, таҷҳизоти техникӣ - як боркунаки фронталию автогрейдер, трактори Т - 28 ва ду автосамосвал пурра таъмиру тармим шуда, ба иҷрои корҳои зимистонӣ комилан омодаанд. Дар ин давра, бо дастгирии мақомоти маҳаллӣ ва кумаки соҳибкорону сокинони диёр 4 километр роҳ асфалтпӯш ва 25 километри дигар сангфарш шуд.
Тибқи нақшаи омодагиҳо ҷиҳати хариди ангишт аз буҷети маҳаллӣ барои соҳаи маориф 280 ҳазор сомонӣ, тандурустӣ 22800 ва соҳаи фарҳанг 4160 сомонӣ маблағ ҷудо гардид, ки барои гузарондани мавсими сармо заминаҳои устувор мегузорад.
Зикр кардан ба маврид аст, ки дар як муддати кӯтоҳ бо саъю талоши ҳамаҷонибаи масъулони соҳаи кишоварзии ноҳия, 6 фермаи чорвои калон ва 48 фермаи чорвои хурд аз таъмир босифат бароварда шуда, ба фасли сармо пурра мутобиқ гардонда шудааст.
Дар деҳаҳои дурдасти маркази ноҳия нуқтаҳои фурӯши ангишт бо нархи арзон созмон дода шудааст.
- Аз ҷониби шабакаҳои барқи ноҳия бошад, мувофиқи нақша таъмиру таҷдиди таҷҳизоти соҳа ба роҳ монда шуда, 9 трансформатор, 50 симчӯб, 80 километр ноқилҳои барқӣ ва ба миқдори 1000 литр равғанҳои трансформаторҳо иваз гардида, дигар қисмҳои зарурӣ низ захира шудаанд. Барои иҷрои пурраи нақшаи омодагиҳо ба фасли сармо мақомоти иҷроияи маҳаллии ҳокимияти давлатии ноҳия дар оянда низ чораҳои муассирро амалӣ хоҳад кард, - афзуд С. Вализода.
Раҳматулло КАРИМЗОДА, «Ҷумҳурият»
Баёни ақида (0) Санаи нашр: 03.12.2018 №: 237 Мутолиа карданд: 924
