иқтисод
СТРАТЕГИЯИ МИЛЛИИ РУШД. ЗАМИНАҲО БАРОИ ОЯНДАИ ДУРАХШОН
Бо мақсади фароҳам овардани заминаи воқеӣ барои рушди устувори иқтисодиву иҷтимоии кишвар ду ҳуҷҷати асосӣ - Стратегияи миллии рушди Ҷумҳурии Тоҷикистон барои давраи то соли 2030 ва Барномаи миёнамуҳлати рушди Ҷумҳурии Тоҷикистон барои солҳои 2016 - 2020 ба тасвиб расидаанд. Дар онҳо ҳадафҳои стратегӣ пешбинӣ шудаанд: таъмини амнияти энергетикӣ ва истифодаи самарабахши неруи барқ, таъмини амнияти озуқаворӣ ва дастрасии аҳолӣ бо ғизои хушсифат, баромадан аз бунбасти коммуникатсионӣ ва табдил ёфтан ба кишвари транзитӣ ва тавсеаи шуғли пурмаҳсул.
Тоҷиддин Ҷӯразода, муовини вазири рушди иқтисод ва савдои ҷумҳурӣ, иброз дошт, ки талошҳои пайгиронаи Президенти Ҷумҳурии Тоҷикистон муҳтарам Эмомалӣ Раҳмон заминаи мусоид фароҳам овард, ки дар муддати кӯтоҳ дар роҳи амалисозии таъмини амнияти энергетикӣ ва баромадан аз бунбасти коммуникатсионӣ натиҷаҳои назаррас ба даст омаданд.
Соли 2017 истеҳсоли неруи барқ ба 18,1 миллиард кВт- соат расонда шуд, ки 0,9 миллиард кВт - соат дар муқоиса ба соли 2016 ва аз рӯи нишондиҳандаи пешбининамудаи барнома 0,2 миллиард кВт - соат зиёд мебошад. Содироти неруи барқ 1,4 миллиард кВт - соатро ташкил дод.
Таҷдиди роҳҳои автомобилгарди Восеъ – Ховалинг ва Сайрон – Қаромиқ, Душанбе – Турсунзода – сарҳади Ӯзбекистон ба анҷом расиданд. Беш аз 275 километр роҳи автомобилгард, 41 километр роҳи оҳан, беш аз 4 километр нақб ва 50 пул бунёд ва барқарор гардиданд.
Корҳои азнавсозии парки автомобилии нақлиёти мусофиркашонии умумии шаҳри Душанбе, терминалҳои наздисарҳадӣ, аз қабили Қулма, Гулистон, Панҷи Поён, Бобоҷон Ғафуров ва таҷдиди роҳи автомобилгарди Хуҷанд – Исфара мутобиқ ба меъёрҳои байналмилалӣ оғоз ёфтанд.
Дар натиҷаи андешидани тадбирҳо аз ҷониби Ҳукумати ҷумҳурӣ истеҳсолоти кишоварзӣ афзуда, эҳтиёҷоти аҳолӣ бо ғизо қариб пурра таъмин гардид. Сатҳи худтаъминкунӣ бо шир ва маҳсулоти он гандум, гӯшт, маҳсулоти гӯштӣ ва тухм ба зиёда аз 80 дарсад расид. Тамоюли мусбат аз лиҳози калория, протеин ва чарбу дар маҳсулоти ғизоии бозорҳои истеъмолии шаҳру деҳот ба назар мерасад, ки ин рӯз ба рӯз беҳбудӣ ёфтани вазъи таъминот бо ғизои босифатро нишон медиҳад.
Бо мақсади тавсеаи шуғли пурмаҳсул дар доираи татбиқи Барномаи миёнамуҳлати рушд то ба имрӯз зиёда аз 350 корхонаи саноатӣ мавриди истифода қарор гирифт, ки ин баробари зиёд шудани ҳаҷми истеҳсоли маҳсулоти саноатӣ ба афзоиши ҷойҳои корӣ мусоидат намуд. Шумораи кормандони корхонаҳои саноатӣ дар муқоиса ба соли гузашта 14 ҳазор нафар афзудааст.
Иронбӣ МӮСОЗОДА, «Ҷумҳурият»
Баёни ақида (0) Санаи нашр: 06.12.2018 №: 241 Мутолиа карданд: 956
