ҳуқуқ
70 СОЛ ДАР ҲИМОЯИ ҲУҚУҚИ БАШАР
10 декабри соли ҷорӣ аз қабули Эъломияи умумии ҳуқуқи башар 70 сол пур мешавад. Санади мазкур то имрӯз дастоварди бузург ва заминаи асосӣ дар таҳия ва қабули ҳуҷҷатҳо дар самти ҳуқуқи инсон мебошад. Он, агарчи хусусияти эъломиявӣ дошта бошад ҳам, дар тамоми ҷаҳон аз ҷониби мардум ҳамчун санади муътабар эътироф шудааст.
Ҷумҳурии Тоҷикистон аз рӯзҳои аввали ба даст овардани Истиқлолияти давлатӣ фаъолона ба ҳаёти ҷомеаи байналмилалӣ ҳамроҳ шудааст. Пешвои миллат ҳанӯз дар давраи омода намудани лоиҳаи Конститутсияи Ҷумҳурии Тоҷикистон борҳо таъкид намуданд, ки ҳуқуқҳои инсон бояд яке аз бахшҳои муҳими Конститутсия бошад.
Аз ин ҷост, ки дар моддаи 5 Конститутсияи Ҷумҳурии Тоҷикистон омадааст: “Инсон ҳуқуқ ва озодиҳои ӯ арзиши олӣ мебошад. Ҳаёт, қадр, номус ва дигар ҳуқуқҳои фитрии инсон дахлнопазиранд. Ҳуқуқу озодиҳои инсон ва шаҳрвандро давлат эътироф, риоя ва ҳифз менамояд”.
Ҳамасола дар ноҳияи Рӯдакӣ бо ташаббуси бахши кор бо ҷавонон ва варзиш, кор бо занон ва оилаи мақомоти иҷроияи маҳаллии ҳокимияти давлатии ноҳия 10 декабрро ҳамчун рӯзи қабули Эъломияи умумии ҳуқуқи башар дар идораву ташкилот ва муассисаҳои таълимӣ қайд мекунанд.
Зимни ҷамъомадҳо, намояндагони сохторҳои мазкур ба мо - ҷавонон таъкид мекунанд, ки ҳамеша ҳушёру зирак бошем ва маърифати сиёсии худро баланд бардорем. Ба доми фиреби гурӯҳҳои террористӣ - экстремистӣ наафтем ва ба хурофоту бегонапарастӣ роҳ надиҳем. Мавриди зикр аст, ки бо қарори Ҳукумати Ҷумҳурии Тоҷикистон аз 29 апрели соли 2009 Барномаи таълимӣ ва тарбияи ҳуқуқи шаҳрвандони Ҷумҳурии Тоҷикистон барои солҳои 2009 – 2019” тасдиқ гардидааст, ки мақсади асосии он баланд бардоштани сатҳи донишҳои ҳуқуқӣ, ташаккули ҳисси масъулиятшиносӣ, ватандӯстӣ, эҳтиром нисбат ба Конститутсия ва қонунҳои амалкунандаи Ҷумҳурии Тоҷикистон, дарк намудани ягонагии ҳуқуқ, озодӣ ва вазифаҳои асосии инсон ва шаҳрванд, мебошад.
Мо ҷавононро зарур аст, ки ба боварии ҷомеа содиқ монда, пайгири суханони пурмуҳтавои Сарвари давлат бошем, ки мегӯянд: “Ҷавонон бояд сабақҳои Истиқлолиятро ҳаматарафа омӯзанд, аз сиёсати имрӯз огоҳ бошанд, таърихи гузаштаву ҳозираи халқи худро гаштаву баргашта варақ зананд ва аз Ватан, миллат, забон ва фарҳанги худ ифтихор намоянд!”.
Зулфия САФАРОВА, донишҷӯи коллеҷи фарҳанги ҷумҳуриявии
ба номи П.Ҷ. Бӯйдоқов
Баёни ақида (0) Санаи нашр: 10.12.2018 №: 243 Мутолиа карданд: 866
