иқтисод
"ФАЙЗОБОДҚАЛЪА". ДИДБОНГОҲИ НАВ ДАР ОТРЯДИ САРҲАДИИ "ПАНҶ"
Дар минтақаи Отряди сарҳадии «Панҷ» - и Қӯшунҳои сарҳадии Кумитаи давлатии амнияти миллии Ҷумҳурии Тоҷикистон дидбонгоҳи нави “Файзободқалъа” ҷавобгӯ ба меъёрҳои муосири замонавӣ барои сарҳадбонон дар фазои тантанавӣ ба истифода дода шуд.
Дар маросими ифтитоҳи он фармондеҳи Қӯшунҳои сарҳадии КДАМ Ҷумҳурии Тоҷикистон Раҷабалӣ Раҳмоналӣ, раиси ноҳия Панҷ Маҳмадюнус Сайфиддинзода ва намояндагони дигар сохторҳои қудратӣ иштирок ва суханронӣ намуданд.
Таъкид шуд, ки Қӯшунҳои сарҳадӣ ҳамчун сохтори низомӣ зодаи даврони Истиқлолияти давлатӣ буда, дар байни дигар мақомоти қудратӣ ҷавонтарин ва пурмасъулияттарин ниҳод ба ҳисоб меравад. Бо тамоми ҷузъу томҳояш аз рӯзҳои аввали таъсис то кунун уҳдадориҳои худро дар самти ҳифзи сарҳади давлатӣ муваффақона иҷро намуда истодааст.
Гуфта шуд, ки Қӯшунҳои сарҳадӣ аз рӯзҳои аввали таъсисёбӣ бо дастгирии бевоситаи Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳи Ҷумҳурии Тоҷикистон муҳтарам Эмомалӣ Раҳмон ба як ниҳоди пурқудрати низомӣ табдил шуда, феълан дорои шароити хуби хизматӣ, техникаву таҷҳизоти муосири марзбонӣ мебошад, ки ҳифзи боэътимоди сарҳадро таъмин намуда, боиси оромӣ ва осоиштагии мардуми Тоҷикистон гардидааст.
Дидбонгоҳи нави сарҳадӣ бо дастгирии Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, Сарфармондеҳи Олии Қувваҳои Мусаллаҳи Ҷумҳурии Тоҷикистон муҳтарам Эмомалӣ Раҳмон аз ҷониби Дирексияи сохтмонии иншооти ҳукуматии Дастгоҳи иҷроияи Президенти Ҷумҳурии Тоҷикистон дар муддати кӯтоҳ сохта шуда, дорои ҳуҷраҳои корӣ, хобгоҳи афсарону сарбозон, синфхонаҳои таълимӣ, китобхона, хонаи фароғатӣ, ҳаммом, ошхона ва майдончаи варзиш мебошад.
Лашкар ШАРИФ, “Ҷумҳурият”
Баёни ақида (0) Санаи нашр: 12.12.2018 №: 245 Мутолиа карданд: 874
