ҳуқуқ
РОҲЗАНӢ. ОҚИБАТИ ҶИНОЯТ ҶАЗОСТ
Чанде қабл ба қисми навбатдории раёсати ВКД дар шаҳри Душанбе оид ба сар задани ҷинояти роҳзанӣ дар кӯчаи Неъмат Қарабоеви ноҳияи Фирдавсӣ хабар доданд. Бо мақсади ошкор ва муайян намудани сабабу омилҳои содиршавии ҷинояти роҳзанӣ як гурӯҳи фаврӣ - тафтишотии кормандони бахши фаврии милитсия ба ҷои ҳодиса сафарбар гардиданд.
Тибқи иттилои маркази матбуоти Вазорати корҳои дохилӣ, ҳангоми азназаргузаронии ҷои ҳодиса муайян карда шуд, ки ду нафар ҷавони ниқобпӯш бо истифода аз ҷиҳози электрошок ба манзили истиқоматии шаҳрванд Гулнора Чекушина ғайриқонунӣ ворид гардида, шавҳар ва духтарашро зери лату кӯб қарор доданд. Ҳолати содир гардидани ҷинояти мазкур ва дар рӯй ниқоб доштани ҷинояткорон, аз кормандони милитсияи барои ошкор ва муайянсозии шахсияти онҳо маҳорати баланди фаврӣ - тафтишотиро талаб мекард. Бо андешидани чораҳои зарурӣ ба кормандони милитсия даст дод, ки дар як муддати кӯтоҳ ҷиноятро ошкор намоянд. Зимни гузарондани тафтишоти навбатӣ ҳамчун гумонбар дар содир намудани ҷинояти роҳзанӣ шаҳрвандон Ҳувайдо Садиров, соли таваллудаш 1983 ва Рустам Файзиев, соли таваллудаш 1997, донишҷӯи курси 4-уми Донишгоҳи молия ва иқтисоди Тоҷикистон дастгир шуданд.
Гумонбаршудагон бо мақсади дарёфти маблағи пулӣ тамоми манзили истиқоматиро кофтуков намуда, аз онҷо 1200 сомонӣ ва як миқдор маснуоти чарчинвориро (биҷутерӣ) рабудаанд, ки бо ин амалашон ба ҷабрдидагон ҳам зарари ҷисмонӣ ва ҳам маънавӣ расонданд. Зарари расондаи роҳзанон 1600 сомониро ташкил медиҳад.
Бо дастрасии далелҳои зикргардида, айни ҳол нисбат ба ҳодисаи мазкур тибқи талаботи моддаи 249 (роҳзанӣ) Кодекси ҷиноятии Ҷумҳурии Тоҷикистон парвандаи ҷиноятӣ оғоз гардида, гумонбарон дар ҳабси пешакӣ қарор доранд.
Сафаргул АЛИМОВА, «Ҷумҳурият»
Баёни ақида (0) Санаи нашр: 13.12.2018 №: 246 Мутолиа карданд: 877
