туризм
РУШДИ ИНФРАСОХТОРИ САЙЁҲӢ. ОМИЛИ МУҲИМИ ҶАЛБИ САЙЁҲОН
Имрӯзҳо дар натиҷаи таблиғу ташвиқ ва корҳои фаҳмондадиҳӣ аксари ширкатҳои сайёҳӣ бештар ба воридоти сайёҳон ва сайёҳии дохилӣ машғул шуда, беш аз 20 хатсайри нави сайёҳӣ ба минтақаҳои гуногуни кишвар роҳандозӣ гардид.
Тибқи нақшаи чорабиниҳои Соли рушди сайёҳӣ ва ҳунарҳои мардумӣ дар ҳар шаҳру ноҳия марказҳои хизматрасонӣ барои сайёҳон ба фаъолият мепардозанд.
Эҳёи гузарҳо ё шаҳракҳои ҳунармандон ва гузаргоҳи хӯрокҳои миллӣ дар назар дошта шудааст. Дастгирии лоиҳаҳои сармоягузорӣ ва нақшаҳои тиҷоратӣ тавассути Фонди дастгирии соҳибкории назди Ҳукумати Ҷумҳурии Тоҷикистон дар самтҳои рушди навъҳои хизматрасонии сайёҳӣ, рушди истеҳсол ва фурӯши маҳсулоти ҳунармандӣ, тармиму таҷдиди ёдгориҳои таърихӣ дар минтақаҳои гуногуни кишвар тасмимҳоеанд, ки вақтҳои наздик амалӣ хоҳанд шуд.
Дар кишвари азизамон барои рушди навъҳои гуногуни сайёҳӣ, аз қабили сайёҳии экологӣ, фарҳангиву таърихӣ, муолиҷавӣ ва шикор имкониятҳо фаровонанд ва онҳо бояд мавриди истифодаи умум қарор гиранд.
Моҳи июли соли 2016 низоми содакардашудаи дастрасии раводид ҷорӣ гардид. Тоҷикистон аз лиҳози низоми содаи гирифтани раводид, аз ҷумла сайёҳӣ дар раддабандии байналмилалии маҷаллаи сайёҳии бритонии “Вандерласт” (“Wanderlust”) дар рӯйхати панҷ кишвари пешсафи ҷаҳон мавқеи чорумро соҳиб шуд. Низоми содакарда бо 80 кишвари олам ба роҳ монда шудааст ва реҷаи бераводид бо 11 кишвар амал мекунад. Шаҳрвандони хориҷӣ давоми 30 рӯз дар кишвари мо бе қайд дар мақомоти дохилӣ будубош карда метавонанд. Ва тибқи дастури Сарвари давлат, ки аз Паёмашон ба Маҷлиси Олӣ (22 декабри соли 2017) бармеояд, барои то 10 рӯз тамдид намудани будубоши шаҳрвандони бо дигар мақсад ташрифоварда аз ҷониби Ҳукумати мамлакат тадбирҳо андешида мешаванд.
Дар маҷмӯъ, дар натиҷаи сиёсати пайгиронаву созандаи Пешвои миллат сол ба сол ташрифи сайёҳон ба мамлакат афзоиш ёфта истодааст. Рушди инфрасохтор яке аз омилҳои муҳими ҷалби сайёҳон ба кишвар арзёбӣ мешавад. Агар дастовардҳо дар ин самт бо чунин суръат зиёд гардад, дур нест, ки Тоҷикистони азизи мо ба макони сайру саёҳати ҷаҳониён табдил ёбад.
Авлиё ХОЛМУРОДОВ, донишҷӯи ДМТ
Баёни ақида (0) Санаи нашр: 14.12.2018 №: 247 Мутолиа карданд: 1165
