ҳуқуқ
ҶИНЯТ ва ҶАЗО
ҚАЛЛОБӢ
Боздошти адвокат
Кормандони Агентии назорати давлатии молиявӣ ва мубориза бо коррупсияи Ҷумҳурии Тоҷикистон зимни амалиёти фаврӣ - тафтишотӣ Исроилова Жанна Ҷалоловна, адвокати коллегияи адвокатҳои “Адл” - и шаҳри Душанберо бо ҷурми гирифтани пора дастгир карданд.
Аз рӯи иттилои дафтари матбуоти агентӣ 15 октябри соли равон шаҳрванд “А” ба агентӣ муроҷиат намудааст, ки Жанна Исроилова барои ба манфиати ӯ ҳал намудани баҳси шаҳрвандӣ вобаста ба манзили истиқоматӣ, ки дар суди шаҳри Душанбе мавриди баррасӣ қарор дорад, бо роҳи фиреб ва суиистифодаи боварӣ давоми соли 2014 маблағи 8300 доллари амрикоӣ гирифта, ба манфиаташ ягон амалро иҷро накардааст.
Илова бар ин, номбурда аз шаҳрванд “А” овардани маблағи 2500 доллари дигар талаб намуда, аз ин миқдор 15 октябри соли равон 5000 сомонӣ гирифта, овардани боқимонда 2000 долларро талаб намудааст.
Жанна Исроилова баъди аз шаҳрванд “А” гирифтани маблағи боқимонда маблағи 2000 доллари амрикоӣ дар ҷои ҳодиса дастгир шуда, нисбат ба ӯ бо моддаи 247 қисми 4 банди «б» Кодекси ҷиноятии Ҷумҳурии Тоҷикистон парвандаи ҷиноятӣ оғоз шуда, санҷиши пешакӣ дар арафаи анҷомёбист.
10 000 СОМОНӢ ПОРА
Раиси заминфурӯш ба даст афтод
Раиси Ҷамоати деҳоти Муҷуни ноҳияи Деваштич Отабойзода Комил Умурбой ҳангоми гирифтани пора барои ҷудо кардани қитъаи замини наздиҳавлигӣ аз ҷониби кормандони Агентии назорати давлатии молиявӣ ва мубориза бо коррупсия дастгир шуд.
Тибқи иттилои агентӣ Комил Отабойзода моҳи августи соли 2018 дар утоқи кориаш аз шаҳрванд “А” барои мусоидат намудан, ҷиҳати ба номи шаҳрвандон “А” ва “Б” аз ҳудуди заминҳои деҳаи Истиқлоли ҷамоати мазкур ҷудо намудани қитъаҳои замини наздиҳавлигӣ маблағи 10 000 сомонӣ ба сифати пора талаб намудааст.
Дар ин раванд К. Отабойзода ҳамчун шахси мансабдори давлатӣ моҳҳои август - октябри соли 2018 дар ду маврид аз шаҳрванд «А» 7000 сомонӣ гирифта, овардани маблағӣ боқимондаро дар ҳаҷми 3000 сомонӣ талаб кардааст.
19 октябри соли 2018 вобаста ба ҳолати мазкур нисбат ба К. Отабойзода бо моддаи 319 қисми 3 Кодекси ҷиноятӣ парвандаи ҷиноятӣ оғоз шуда, бо гузарондани чорабиниҳои фаврӣ - тафтишотӣ номбурда баъди аз шаҳрванд “А” гирифтани маблағи боқимонда дастгир ва нисбаташ парвандаи ҷиноятӣ оғоз шуда, баъди анҷоми тафтишоти пешакӣ барои баррасӣ ба суд ирсол гардид.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 17.12.2018 №: 248 Мутолиа карданд: 1212
