фарҳанг
"ИЛМ ДАР ТОҶИКИСТОН" ВА СОЛНОМАНИГОРИИ СОҲАВӢ
Ҷиҳати боз ҳам беҳтар ба роҳ мондани тарғиби дастовардҳои назарраси олимон ва пажӯҳишгарони ҷумҳурӣ аз ҷониби Китобхонаи марказии илмии ба номи Индира Гандии Академияи илмҳо дастури нави библиографӣ зери унвони «Илм дар Тоҷикистон: Солнома» ба нашр расид. Чуноне ки аз дебочаи феҳристи мазкур бармеояд, маводи библиографӣ дар асоси захираи нусхаҳои ҳатмии осори чопии ба фонди китобхона воридгардида, аз ҷумла китобу мақолаҳои олимон ва фаъолияти илмии муассисаҳои Академияи илмҳо дар соли 2017 мураттаб гардидааст.
Феҳристи «Илм дар Тоҷикистон» асосан тафсири библиографии осори чопии монографияҳо, маҷмӯаҳо, мақолаҳо аз матбуоти даврӣ ва фишурдаи суханрониҳо дар конференсияҳои илмии ватанӣ ва хориҷиро инъикос менамояд. Ҷобаҷогузории адабиёт дар ин дастури библиографӣ дар асоси ҷадвали таснифоти универсалӣ сурат гирифта, дар дохили шуъбаҳо мавод аз рӯи шакли нашр, забон ва дар дохили онҳо бо тартиби алифбои ному насаби муаллифон ва унвони асарҳо мураттаб гардидаанд. Унвони ҳамаи нашрҳо ба забони асл ва тибқи стандарт тасвир ёфтаанд.
Феҳристи «Илм дар Тоҷикистон» ягона сарчашмаи библиографии илмӣ - ёрирасон барои дарёфти маводи чопӣ ба шумор меравад. Ҷои таассуф аст, ки библиографони ватанӣ дар нашри чунин дастурҳо аз сабаби набудани сарпарастон танқисӣ мекашанд. Бинобар ин, феҳристи мазкур бо теъдоди кам чоп шудааст, ки он ҳатто барои таъмин намудани китобхонаҳои универсалӣ, оммавӣ, илмӣ, соҳавӣ ва муассисаҳои таълимии олӣ басанда нест.
Сайзароб НАДИРОВ,
Нуралӣ ҲИКМАТОВ,
кормандони Китобхонаи
миллии Тоҷикистон
Баёни ақида (0) Санаи нашр: 17.12.2018 №: 248 Мутолиа карданд: 805
