ҳуқуқ
ҶИНОЯТ ВА ҶАЗО
НАФСИ БАД КОМАНДИРИ ҚИСМИ ҲАРБИРО БА ТОЛОРИ СУД БУРД
Агентии назорати давлатии молиявӣ ва мубориза бо коррупсия парвандаи ҷиноятӣ нисбат ба Амиршо Раҳмонов, командири взводи ротаи тирандози савораи яке аз қисмҳои ҳарбии Вазорати мудофиаи Ҷумҳурии Тоҷикистонро баъд аз анҷоми тафтиши пешакӣ барои моҳиятан баррасӣ намудан ба суд ирсол кард.
Бино ба иттилои дафтари матбуоти агентӣ, номбурда бо ҷурми талаби пора аз як сарбози қисми ҳарбии таҳти итоаташбуда, боздошт гардидааст. Ба навиштаи манбаъ, Амиршо Раҳмонов тахминан моҳи июни соли 2018 дар ҳудуди қисми ҳарбӣ аз сарбози қаторӣ «А» барои аз адои минбаъдаи хизмати ҳарбӣ озод намуданаш 15000 сомонӣ талаб кардааст.
Аз сабаби он ки сарбоз ин миқдор маблағро дар ихтиёр надошт, ба командир изҳор медорад, ки автомашинаи тамғаи «Мереседес-Бенс» - и падарашро фурӯхта маблағи зикршударо ба ӯ медиҳад. Дар ҳамин ҳол, Амиршо Раҳмонов баъди шунидани ин ҳарфҳо бо истифода аз фурсат на маблағ, балки автомашинаро талаб менамояд, ки дар ниҳоят боиси ҷавобгарии ҷиноятӣ шуд. Ӯро кормандони агентӣ дар натиҷаи гузарондани чорабиниҳои фаврӣ - тафтишотӣ баъд аз бо роҳи фиреб ва суиистифодаи боварӣ ба номи худ ҳуҷҷатгузорӣ намудани автомашинаи мазкур дастгир намуданд.
Ин амали ҷиноятӣ тибқи моддаи 247 қисми 4 банди «б» Кодекси ҷиноятии Ҷумҳурии Тоҷикистон бандубаст шудааст.
МАСТӢ ОҚИБАТ БА ҲАЛОКАТИ ЯК НАФАР АНҶОМ ЁФТ
Нишасти ҳарифонаи ду сокини шаҳри Панҷакент, ки маркази матбуоти Вазорати корҳои дохилии Ҷумҳурии Тоҷикистон аз онҳо - мардони 43 ва 52 - сола ном бурдааст, бо фоҷиа анҷом ёфт.
Сомонаи ВКД дар шарҳи ин хабар менависад, ки ин афрод рӯзи 14 декабр баъд аз истеъмоли машрубот дар хонаи истиқоматии марди 43 - солаи шаҳри Панҷакент вориди муноқиша мешаванд. Дар натиҷаи моҷарои бархоста, марди 52 – сола аз тирезаи ҳамин хона, ки дар ошёнаи чаҳорум қарор дошт, ба замин сарозер шуда, дар ҷойи ҳодиса ба ҳалокат расидааст.
Дар пайи ин ҳодиса марди 43 – сола бо гумони қасдан расондани зарари вазнин ба саломатӣ аз ҷониби кормандони милитсия боздошт гардида, нисбат ба ӯ парвандаи ҷиноятӣ оғоз шудааст.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 20.12.2018 №: 251 Мутолиа карданд: 942
