ҳуқуқ
ҶИНОЯТ БЕ ҶАЗО НАМЕМОНАД!
Бурҳон Исҳоқов нимаи моҳи декабри соли 2007 бо ҳамсинфи худ Наим Холматов оид ба дуздидани маблағи пулии шаҳрванд Раҳматов Аскар ба андозаи панҷсад - ҳафтсад ҳазор рубли русӣ маслиҳати пешакӣ мекунад.
Бино ба иттилои маркази матбуоти Прокуратураи генералии кишвар, Б. Исҳоқов бо Н. Холматов хабардор мешаванд, ки 21 декабри соли 2007 аҳли оилаи Раҳматовҳо барои гузарондани маъракаи шашмоҳаи фавти бобояшон ба деҳаи Зарбеди ҷамоати Пӯлодони шаҳри Конибодом мераванд ва дар хонаи онҳо ягон нафар намемонад. Онҳо бо мақсади амалӣ намудани нақшаашон, яъне тасарруфи амволи ғайр ба миқдори махсусан калон ва минбаъд оташ задани хона ҳамон рӯз ба нуқтаи фурӯши сӯзишвории «Фирдавс» рафта, ба як зарфи якунимлитраи полиэтелинӣ маводи сӯзишвории бензин мегиранд ва ба манзили истиқоматии шаҳрванд А. Раҳматов ҳозир мешаванд. Сипас бо шикас- тани қулфи дар вориди ҳавлӣ гардида, кофтукови маблағи пулиро дар ҳуҷраҳо оғоз карданд. Дар ин вақт духтари соҳибмулк Аскар Раҳматов - ноболиғ Р. Раҳматова, ки худ танҳо дар ҳавлӣ қарор дошт, дарро кушода вориди хона шуд.
Б. Исҳоқов бо Н. Холматов ба хона ворид шудани ноболиғ Р. Раҳматоваро дида, бо назардошти он, ки ӯ онҳоро нағз мешинохт ва оид ба амалҳои ҷиноятиашон имконияти хабар доданро дошт, нақшаи қасдан аз ҳаёт маҳрум сохтани ӯро кашиданд. Дар ин лаҳза Б. Исҳоқов дар қафои дар пинҳон шуда, аз пушт ба ноболиғ Р. Раҳматова ҳуҷум карда, ба воситаи чӯб гулуи ӯро фишурда, ин амали худро то лаҳзаи беқувват шудани ӯ давом медиҳад. Н. Холматов дар навбати худ ба воситаи чӯб ба сари ноболиғ як зарба мезанад.
Баъдан, ҷасади беҷони ноболиғ Р. Раҳматоваро ба даҳлез гузошта, ба хона бензин рехта, оташ заданд ва дари ҳуҷраро пӯшида, аз ҷои ҳодиса ғайб заданд.
Нисбат ба Б. Исҳоқов ва Н. Холматов бо аломатҳои моддаҳои 244 қисмҳои 3 ва 4 банди «б» (барои дуздӣ), 104 қисми 2 бандҳои «в,з,и,л» (барои одамкушӣ) ва 255 қисми 2 бандҳои «а,в» (барои несту нобуд кардани амвол) Кодекси ҷиноятии Ҷумҳурии Тоҷикистон парвандаи ҷиноятӣ оғоз шуда, баъди ба итмом расидани тафтиши пешакӣ, парвандаи ҷиноятии мазкур бо тасдиқи фикри айбдоркунӣ барои баррасӣ намудан ба суди вилояти Суғд ирсол гардид.
Бо ҳукми коллегияи судӣ оид ба парвандаҳои ҷиноятии суди вилояти Суғд аз 11 апрели соли 2018 Бурҳон Исҳоқов ва Наим Холматов дар содир кардани ҷинояти мутобиқи моддаҳои дар боло зикр намудаи Кодекси ҷиноятии Ҷумҳурии Тоҷикистон гунаҳгор дониста, ба ҳар яке аз онҳо ҷазо дар намуди маҳрум сохтан аз озодӣ ба муҳлати 24 (бисту чор) сол бо нигоҳ доштан дар колонияҳои ислоҳии низомаш сахт таъйин карда шуд.
М. БАҲРОМ, «Ҷумҳурият»
Баёни ақида (0) Санаи нашр: 24.12.2018 №: 253-254 Мутолиа карданд: 784
