фарҳанг
"ФАРҲАНГИ ҶОЙНОМҲОИ МИЛЛӢ" РӮИ КОР ОМАД
Бо мақсади танзими дурусти корбурди ҷойномҳо дар ҳудуди кишвар «Фарҳанги ҷойномҳои миллӣ» таҳия гардид. Фарҳанги мазкур аз ду қисм иборат мебошад. Дар қисмати аввали китоб номи деҳаҳои Тоҷикистон шарҳу тафсир ёфтаанд. Дар қисмати дувум таҳти унвони «Тавсияномҳо» номҳо дар асоси сарчашмаҳои илмӣ ва таърихӣ ҷамъоварӣ гардида, пешниҳод шудаанд. Ин қисмат барои иваз намудани номҳои ғайримеъёрӣ истифода хоҳад шуд.
Бо мақсади таҳияи «Фарҳанги ҷойномҳои миллӣ» дар Кумитаи забон ва истилоҳоти назди Ҳукумати Ҷумҳурии Тоҷикистон гурӯҳи босалоҳияте аз ҳисоби мутахассисони забоншинос, бахусус ҷойномшиносҳои (топонимшиносҳо) маъруфи кишвар таъсис дода шуд. Ба ҳайати он олимон ва мутахассисони шинохтаи соҳа, аз қабили Бобо Назар - Ғафор, Ш. Исмоилов, С. Матробиён, О. Маҳдаҷонов, А. Мирбобоев, С. Мирзоев, М. Ҳотам, С. Назарзода, Н. Офаридаев, Р. Ваҳҳобзода, Д. Ҳомидов, Б. Тӯраев, Г. Шарофзода, Р. Шодиев, Р. Зулфониён ҷалб шуда буданд.
Гурӯҳи мазкур дар муддати ду моҳ номи мавзеъҳои мавҷудаи Тоҷикистонро, ки аз ҷониби мутахассисони Кумитаи забон ва истилоҳот ҷамъоварӣ шуда буданд, мавриди таҳлили илмӣ ва баррасӣ қарор дода, дар такя бо маъхазҳои илмӣ номҳоро тафсир намуданд.
Ин фарҳанг ба вазорату идораҳои дахлдор, инчунин, олимони бонуфузи ҷумҳурӣ барои тақриз пешниҳод гардид, Муқарризон баъзе нуқсҳои онро барои ислоҳ пешниҳод намуданд. Сипас, гурӯҳи корӣ эродҳои муқарризонро омӯхта, бо пазируфтани эродҳои қобили қабул фарҳангро ислоҳ намуд. «Фарҳанги ҷойномҳои миллӣ» ҳамчун як фарҳанги мукаммал омода шуда, рӯзҳои наздик ба дасти ҳаводоронаш мерасад.
Лола РИЗОӢ, «Ҷумҳурият»
Баёни ақида (0) Санаи нашр: 24.12.2018 №: 253-254 Мутолиа карданд: 906
