ҳуқуқ
ҶИНОЯТ ВА ҶАЗО
ПОРА. Боз як хизматчии ҳарбӣ дастгир шуд
16 октябри соли равон шаҳрванд «А» ба Агентии назорати давлатии молиявӣ ва мубориза бо коррупсияи Ҷумҳурии Тоҷикистон муроҷиат кард, ки мутахассиси пешбари зершуъбаи даъват ва тайёрии ҷавонон ба хизмати ҳарбии комиссариати ҳарбии ноҳияи Рӯдакӣ Сироҷиддини Мирзомуддин бо истифода аз мақоми хизматӣ аз ӯ бо роҳи ба таъхир андохтани муҳлати даъват ба хизмати ҳарбӣ ва додани билети ҳарбӣ 4 ҳазор сомонӣ талаб намудааст.
Бино ба иттилои дафтари матбуоти агентӣ, 18 октябри соли ҷорӣ ҳангоми гузарондани амалиёти фаврӣ-тафтишотӣ Сироҷиддини Мирзомуддин баъди аз шаҳрванд «А» гирифтани маблағи 4000 сомонӣ дар ҷои ҳодиса дастгир гардида, маблағи мазкур аз ӯ ҳамчун далели шайъӣ гирифта шуд. Нисбат ба Сироҷиддини Мирзомуддин бо моддаи 247, қисми 2, бандҳои «в,г» - и Кодекси ҷиноятии Ҷумҳурии Тоҷикистон парвандаи ҷиноятӣ оғоз гардида, баъди ба анҷом расидани тафтиш ба суд ирсол шуд.
ҚАРЗ вақте пардохт намешавад...
Ҷомӣ Ошурбеков, истиқоматкунандаи деҳаи Башори Ҷамоати деҳоти Қозидеҳи ноҳияи Ишкошим бо мақсади тасарруфи маблағҳои ба тариқи кредит додашуда 7 октябри соли 2015 дар асоси шартнома аз БДА ҶТ «Амонатбонк» аз ҳисоби маблағҳои гардиши Муассисаи давлатии «Фонди дастгирии соҳибкории назди Ҳукумати Ҷумҳурии Тоҷикистон» дар ҳаҷми 400 000 (чорсад ҳазор) сомонӣ қарзи имтиёзнок ба муҳлати 2 сол барои таъсиси сехи коркарди меваи хушк ва нигоҳдории меваю сабзавот гирифтааст.
Тибқи иттилои маркази матбуоти Прокуратураи генералӣ, ӯ ин маблағҳоро ғайримақсаднок ба манфиати шахсиаш истифода бурда, то ин давра, ба муассиса ба маблағи 130307 сомонӣ пардохт намуда, маблағи боқимонда 269 693 сомониро барнагардондааст.
Оид ба ҳодисаи мазкур аз ҷониби прокурори ноҳияи Ишкошим 22 сентябри соли равон нисбат ба Ҷомӣ Ошурбеков бо моддаи 246 қисми 3 банди «б» (барои ғайриқонунӣ истифода намудани маблағҳои қарзи бонкӣ) Кодекси ҷиноятии Ҷумҳурии Тоҷикистон парвандаи ҷиноятӣ оғоз гардида, баъди ба итмом расидани тафтишотӣ пешакӣ бо тасдиқи фикри айбдоркунӣ ба суд ирсол шуд.
Бо ҳукми суди ноҳияи Ишкошим аз 5 декабри соли 2018 Ҷ. Ошурбеков ба муҳлати 8 сол аз озодӣ маҳрум карда шуд.
Шуъбаи ҳуқуқи рӯзноми «Ҷумҳурият»
Баёни ақида (0) Санаи нашр: 24.12.2018 №: 253-254 Мутолиа карданд: 887
