ҳуқуқ
ҚАЛЛОБӢ. БОРИ ЧОРУМ ПАСИ ПАНҶАРА
Ҷӯрабек Бобохонов нафаре, ки қаблан бо ҳукми суд се маротиба маҳкум шудааст, боз даст ба содир намудани ҷиноят зад ва паси панҷара рафт.
Моҳи августи соли 2017 ӯ ҳамроҳи падараш - А. Бобохонов, ки соҳибкор мебошад, ба шаҳри Ҳисор омада, аз мағозаи Ҷамолиддин Холиқов 50 халта ордро ғайринақдӣ гирифта, пас аз 10 рӯз маблағи пулиро баргардонд. Ӯ бори дуюм ба мағозаи соҳибкор Ҷ. Холиқов омада, 25 халта орд гирифт ва маблағашро надод. Ҷӯрабек ба назди Ҷ. Холиқов омада хоҳиш кардааст, ки барои дуруст намудани ҳуҷҷатҳои манзили истиқоматиаш маблағ диҳад. Ӯ онро фурӯхта, ҳамаи қарзҳояшро бармегардонад. Ҳамин тариқ, мавсуф дар аввал аз Ҷамолиддин Холиқов чор ҳазор сомонӣ гирифта, баъдан якчанд маротибаи дигар бо баҳонаи дуруст кардани ҳуҷҷатҳои хона маблағи пули ба миқдори 3000, 4000, 5000, 10000 сомонӣ гирифта, ваъда додааст, ки манзили истиқоматиро фурӯхта, мабалғҳояшро бармегардонад. Дар маҷмӯъ, ӯ аз Ҷамолиддин Холиқов 669450 сомонӣ гирифта, то ҳол пардохт накардааст.
Тибқи иттилои маркази матбуоти Прокуратураи генералӣ, аз рӯи ин ҳодиса нисбат ба Ҷӯрабек Бобохонов бо моддаи 247 кисми 4 банди «б» (қаллобӣ) Кодекси ҷиноятии Ҷумҳурии Тоҷикистон парвандаи ҷиноятӣ оғоз гардида, баъди ба итмом расидани тафтишоти пешакӣ бо тасдиқи фикри айбдоркунӣ ба суд ирсол гардид.
Бо ҳукми суди шаҳри Ҳисор Ҷ. Бобохонов бо моддаи зикргардида гунаҳгор дониста шуда, ба муҳлати 9 сол аз озодӣ маҳрум гардид. Ӯ муҳлати адои ҷазоро дар колонияи ислоҳии низомаш пурзӯр сипарӣ хоҳад кард.
М. БАҲРОМ, «Ҷумҳурият»
Баёни ақида (0) Санаи нашр: 27.12.2018 №: 257-258 Мутолиа карданд: 851
