маориф
ТАРБИЯ ОМИЛИ МУҲИМИ ПЕШРАФТ
"Бори дигар ба падару модарони азиз муроҷиат карда, аз онҳо хоҳиш менамоям, ки ба таълиму тарбияи фарзандон аҳамияти аввалиндараҷа диҳанд", - таъкид карданд Пешвои муаззами миллат муҳтарам Эмомалӣ Раҳмон дар Паёми худ ба Маҷлиси Олӣ, 26 декабри соли равон. Зеро ин бесабаб нест. Мутафаккирони мо ҳамеша ба тарбияи башардӯстии инсон арҷ гузоштаанд.
Ниёгони мо одоби ҳамидаро на танҳо таъкид кардаанд, балки бо кору пайкори нек ва рӯзгори омӯзандаашон ба субот расондаанд.
Масъалаи басо муҳим рӯҳияи башардӯстонаи дарсҳои омӯзгорон аст. Яъне, чӣ бояд кард, то шогирд пас аз камоли касб кардан, дар баробари пеш бурдани як соҳа, инчунин, ба шахсони касбу кори гуногун, пиру ҷавон ва дар маҷмӯъ ба атрофиён эҳтироми вижа дошта бошад.
Педагогони машҳур, аз ҷумла М. Липман пешниҳод мекунад, ки бахши махсуси фанҳои тарбиявие таҳия шавад, ки бо усули тадқиқотии машқӣ - бозигии коллективӣ асос ёфта, шогирдон дар шароити мушкилии хусусияти ахлоқидошта тавассути муҳокимаву тадқиқи он бояд ҳалли дуруст ёбанд. Пайдост, ки зимнан аъзои гурӯҳ дар амал рафъ намудани низоъҳоро ба таври табиӣ ҳангоми муҳокима пайдо мекунанд, меомӯзанд, ҳамин тариқ, тарбия барои онҳо на танҳо омӯзиши одӣ, балки бо ҳаёти онҳо пайванд меёбад.
Ҳангоми омӯзиши ҳаракатҳо, бархӯрдҳо, баҳодиҳӣ ба падидаҳо, самтгирӣ дар вазъиятҳо рафтор такмил меёбад.
Афлотун чунин меҳисобид, ки ба бачагон омӯзондани намудҳои зарурии фаъолият бояд тадриҷан сурат гирад, то ки дар онҳо якбора вокуниши сахти манфӣ ангехта нашавад. Арасту ҳадафҳои умумии маорифро бевосита ифода карда буд: дар шогирд ташаккул додани қобилиятҳои зеҳнию амалӣ, инчунин, сифатҳои ахлоқӣ.
Шогирд бояд худаш зарурату ногузирии азхудкунии маводи таълимиро дарк намояд, амалиёти таълимиро такрор карда, онро ба одат табдил диҳад. Ҳамин тавр, дар шогирд ҳам сифатҳои иродавӣ ва ҳам ақлӣ ташаккул меёбанд.
Барои он ки аз шогирд олим ба воя расад, бояд ба ҳисси кунҷковии табиии ӯ такя кард ва онро бо ҳар васила сайқал дод. Устод шогирдро бо баҳои аъло барои кашфиёти хурди мустақилона эҷод намудааш ҳавасманд намояд. Ин шавқу рағбати таҳқиқгарии ӯро таҳрик медиҳад ва ба худтакмилдиҳӣ водор месозад.
Шаҳноз ҒАНИЕВА, омӯзгор
Баёни ақида (0) Санаи нашр: 27.12.2018 №: 257-258 Мутолиа карданд: 1026
