маориф
ҲАМҚАДАМИ ЗАМОН БОШЕМ!
Агар омӯзгор сатҳи баланди касбият надошта бошад, мо ҳеҷ гоҳ ва бо ягон восита сифати таълиму тарбияро беҳтар карда наметавонем.
Эмомалӣ РАҲМОН
Ниёгони мо ҳаққи устод – омӯзгорро волотар аз ҳаққи волидайн дониста, таъкид кардаанд, ки «Ҳаққи устод аз падар беш аст, В-аз падар устод дар пеш аст». Дар ин росто, Пешвои миллат муҳтарам Эмомалӣ Раҳмон низ дар Паёми навбатии хеш ба Маҷлиси Олии Ҷумҳурии Тоҷикистон ба қадру манзалати омӯзгорон арҷ гузошта, ояндасозиро рисолати онҳо хонданд.
Ин таъкид моро водор мекунад, ки ҳамқадами замон бошем. Бо донишҳои техникӣ, кор бо компютер, шабакаҳои интернетӣ ва забонҳои хориҷӣ мусаллаҳ шавем. Зеро таълиму тарбияи насли имрӯз масъулиятҳои бештаре дорад, ки қаблан вуҷуд надоштанд. Ҳоло аксари хонандагони мактаб бо техникаву технология ва дигар васоити иттилоотӣ баладанд ва саволҳое медиҳанд, ки дар посухашон кас оҷизӣ мекашад.
Муаллими замони нав на танҳо хонандаи худро аз донишҳои замона баҳравар гардонад, балки омӯзонад, ки шогирд алорағми зуҳуроти номатлуби ҷаҳон, ба монанди ифротгароиву ситезаҷӯӣ ва иттилооти бешумори мағзшӯ истодагарӣ карда тавонад.
Сарвари давлат ба тарбияи ватанпарастӣ, азхудкунии донишҳои муосир, забонҳои хориҷӣ, муносибати боэҳтиромона ба таърих диққати махсус дода, таъкид менамояд, ки аз фаъолияти қаҳрамононаи насли калонсол ибрат гиранд. Яъне, вақти он аст, ки хонанда дар симои омӯзгораш на танҳо як шахси донишманду ҳозирҷавоб, балки идеали ояндаи худро бубинад.
Ин ҳама таъкидҳои Пешвои миллат дар он хулоса мешавад, ки танҳо миллати босаводу соҳибмаърифат ва кадрҳои донишманду баландихтисос метавонанд дар оянда давлати соҳибистиқлоли тоҷиконро ба ҷомеаи башарӣ ба таври шоиста муаррифӣ кунанд ва обрӯю мартабаи Тоҷикистони мо дар байни кишварҳои пешрафтаи олам боз ҳам баландтар гардад.
Тобистон ИМОМНАЗАРОВА,
омӯзгори МТМУ № 86 - и шаҳри Душанбе
Баёни ақида (0) Санаи нашр: 09.01.2019 №: 8 Мутолиа карданд: 1048
