туризм
РУШДИ ДЕҲОТ - РУШДИ ТОҶИКИСТОН
Дубора ба масоили таҳкими пояҳои инфрасохтории рушди сайёҳӣ ва ҳунарҳои мардумӣ рӯй овардани Пешвои муаззами миллат ва эълон доштани солҳои 2019-2021 ба унвони Солҳои рушди деҳот, сайёҳӣ ва ҳунарҳои мардумӣ аз таваҷҷуҳи хосса нисбат ба пешрафти соҳаҳои мавриди назар арзёбӣ мегардад.
Дарвоқеъ, рушди деҳот, сайёҳӣ ва ҳунарҳои мардумӣ ба ҳам тавъаманд.
Аксари шаҳрвандони мамлакат дар деҳот зиндагӣ мекунанд. Аз ин рӯ, муҳайё сохтани шароитҳои инфрасохтории деҳот - бунёд ва таҷдиди роҳҳо, муассисаҳои таҳсилотӣ, тандурустӣ, кашидани хатҳои оби тозаи ошомиданӣ, бунёди иншооти маишӣ, марказҳои фарҳангию фароғатӣ ва марказҳои савдою хизматрасонӣ барои пешрафту шукуфоии деҳоти мамлакат ва зиндагии шоистаи сокинони он заминаи арзишманде хоҳад буд.
Аз ҷониби дигар, мавзеъҳои таърихию фарҳангӣ ва табиии кишвар дар деҳот ҷойгиранд. Аз ин рӯ, сайёҳони хориҷие, ки ба Тоҷикистон ташриф меоваранд, бо иқтидори сайёҳии мамлакат шиносоӣ пайдо хоҳанд кард. Ин имкон медиҳад, ки сатҳи сифати пешниҳоди хизматрасониҳои сайёҳӣ бамаротиб боло рафта, Тоҷикистонро ба як кишвари воқеан пешрафта миёни кишварҳои ҷаҳон қарор бидиҳад.
Азбаски қисми зиёди аҳолии мамлакат дар деҳот зиндагӣ мекунанд, пас раванди беҳсозӣ ва ривоҷу равнақи ҳунарҳои мардумӣ низ дар деҳот бештар ба назар мерасад. Солҳои рушди деҳот, сайёҳӣ ва ҳунарҳои мардумӣ эълон гардидани солҳои 2019-2021 ҷиҳати тақвияти раванди дастгирии ҳунармандони халқӣ, таъмини шароити мусоиди кору фаъолияти ҳунармандон дар ин самт, муаррифии ҳунарҳои мардумӣ ба ҷаҳониён ва, билохира, рушди саноати истеҳсоли армуғони миллӣ ва пешниҳоди он ба сайёҳони хориҷӣ заминаи мусоид фароҳам хоҳад овард.
Ҳамзамон, бунёди иншооти инфрасохторӣ дар деҳоти мамлакат метавонад шумораи зиёди сокинони деҳоти мамлакатро бо ҷойҳои нави корӣ таъмин намуда, ба ин васила сатҳи некуаҳволии онҳоро баланд бардорад.
Фазлиддин ҚОДИРОВ,
мудири кафедраи туризми Донишкадаи соҳибкорӣ ва хизмат
Баёни ақида (0) Санаи нашр: 09.01.2019 №: 8 Мутолиа карданд: 1524
