маориф
МАОРИФ. ТАКМИЛИ ИХТИСОС ТАКМИЛИ СОҲА АСТ
Паёми навбатии Пешвои миллат муҳтарам Эмомалӣ Раҳмон ба Маҷлиси Олӣ самтҳои асосии сиёсати дохилӣ ва хориҷии мамлакатро дар давраи имрӯзу оянда ба таври мукаммалу возеҳ муайян намуд. Дар ҳақиқат, Паёми имсола бо мазмуну мундариҷа ва муҳтавои хеш аз дигар паёмҳо фарқ мекунад. Пешвои миллат дар Паём таъкид намуданд, ки дар раванди созандагӣ ҳар як шаҳрванди бонангу номус бояд саҳмгузор бошад.
Бо мақсади иҷрои супориши Сарвари давлат ҷиҳати таъсиси Биржаи озоди меҳнати донишҷӯён як қатор корҳо ба анҷом мерасанд. Ба гуфтаи ректори Донишгоҳи давлатии Данғара Н. Шоҳиён ташкили чунин биржа имкон медиҳад, ки ҳар як донишҷӯ пас аз машғулиятҳо вобаста ба ҳунару маҳорат ва истеъдоди хеш машғул шуда, аз он фоидаи молиявӣ ба даст орад.
Агар дастуру супоришҳои Пешвои муаззам дар тамоми кишвар иҷро шавад, яъне мардум ба ҳунар ё шуғле фаро гирифта шаванд, сатҳи камбизоатӣ аз 29 дарсаде, ки дар Паём ишора гардид, хеле поён мефарояд.
Пешвои миллат дар Паёмашон, ҳамчунин, аз он изҳори нигаронӣ намудаанд, ки дар соҳаи маориф ду проблемаи асосии ҳалталаб вуҷуд дорад. Якум, норасоии кадрҳои соҳибкасби омӯзгорӣ ва дуюм, баланд бардоштани сатҳу сифати таълим дар тамоми муассисаҳои таҳсилотии кишвар.
Пешвои миллат оид ба такмили ихтисоси омӯзгорон, гузарондани аттестатсияи онҳо ва таҳкими раванди таълими забонҳои русӣ ва англисӣ дастур доданд. Агар мо хоҳем, ки Тоҷикистонро дар олам ҳамчун кишвари тамаддунофару фарҳангдӯст, пешрафтаю гулгулшукуфон ва мардумаш меҳмоннавоз шиносанд, бояд ба ҷавонону наврасон забонҳои русӣ ва англисиро ба дараҷаи баланд омӯзонем. Ин амалро таъҷилан иҷро намуда, роҳу усули илмию методиро ҷиҳати омӯзиши пурраю мукаммали ин ду забони байналмилалӣ ёфтанамон ҳатмист.
Дар Донишгоҳи давлатии Данғара бо мақсади иҷрои дастуру супоришҳои Пешвои миллат комиссияи санҷишӣ оид ба сатҳу сифати дарсҳои омӯзгорон ва донишазхудкунии донишҷӯён таъсис дода шуд.
Асомуддин АЗИЗОВ,
устоди Донишгоҳи давлатии Данғара
Баёни ақида (0) Санаи нашр: 11.01.2019 №: 10 Мутолиа карданд: 1166
