иқтисод
БОҒҲОИ ИНТЕНСИВӢ. АЗ ТЕППАҲОИ НАМДОР ИСТИФОДА КУНЕМ!
Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон зимни ироаи Паём ба Маҷлиси Олӣ масъалаи вусъати истеҳсолоти кишоварзиро бо мақсади таъмини пурраи аҳолии мамлакат бо маҳсулоти ватанӣ таъкид дошта, дастур доданд, ки аз ҳисоби заминҳои бекорхобидаву доманакӯҳҳо майдони боғу токзор, аз ҷумла боғҳои интенсивӣ, мунтазам зиёд карда шаванд. Ин нукта аз бисёр ҷиҳат муҳим мебошад.
Солҳои охир Ҳукумати кишвар даҳҳо барномаи рушди соҳаи кишоварзиро қабул намуд, ки ба иҷрои босифати супоришҳои Президенти кишвар такон мебахшанд. Дар заминаи амалишавии барномаҳо, пеш аз ҳама, барои таъмини амнияти ғизоии аҳолии мамлакат ва тақвияти содироти маҳсулоти кишоварзӣ имконият фароҳам меояд. Ҳамчунин, дар шароити кӯҳсори Тоҷикистон ва кам будани заминҳои ҳамвори кишт ташкили боғҳо, хусусан интенсивӣ дар доманакӯҳҳо яке аз роҳҳои босамари рушди кишоварзист. Аз як тараф, раванди боғдорӣ дар кишвар бехалал вусъат меёбад, аз ҷониби дигар, доманакӯҳҳои кишвар самаранок истифода мегарданд. Ба ин васила, барои ривоҷ додани парвариши сабзавот аз ҳисоби заминҳои ҳамвор имконияти бештар фароҳам меояд. Ҳоло маҳсулоти аз лиҳози экологӣ тоза ва барои саломатӣ манфиатбахши боғу токзори Тоҷикистон дар бозорҳои ҷаҳонӣ эътибори баланд пайдо намуда, талабот ба он пайваста зиёд мешавад. Бинобар ин, роҳбарону масъулони соҳаи кишоварзиро зарур аст, ки дастуру супоришҳои Сарвари давлатро сармашқи кор намуда, раванди боғу токпарвариро ҳар чи бештар равнақ бахшанд. Олимону мутахассисони соҳа дар навбати худ бояд корҳои таҳқиқотию ихтироъкориро ҷиҳати дар истеҳсолот ҷорӣ намудани кишти навъҳои сермаҳсули маҳаллӣ ва ба раванди дигаргуншавии иқлим тобовари зироатҳо бештар вусъат диҳанд.
Сайдалӣ ГУЛОВ,
узви вобастаи Академияи илмҳои
Ҷумҳурии Тоҷикистон, профессор
Баёни ақида (0) Санаи нашр: 11.01.2019 №: 10 Мутолиа карданд: 925
