фарҳанг
"УФУҚҲОИ ИСТИҚЛОЛ" - САРЧАШМАИ БОЭЪТИМОДИ ХУДШИНОСӢ
Дар ин китоби арзишманди Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сухан аз бурду бохт ва дастовардҳои беназири замони соҳибистиқлолӣ меравад. Он фарогирандаи тамоми самтҳои асосии ҳаёти ҷомеа мебошад. Махсусан, ҳадафҳои стратегии кишвар баҳри расидан ба ояндаи дурахшони кишварамон хеле ҷолиб арзёбӣ шудааст.
Дар боби аввали китоб бо овардани мисол аз оқибатҳои сангини давраи ҷанги шаҳрвандӣ зикр мегардад, ки бадхоҳони миллат ба эътибор нагирифтанд, ки идеологияи онҳо ба воқеияти имрӯзаи ҷамъиятӣ ва геополитикии давр созгор нест.
Дигар масъалае, ки дар китоб ба таври мукаммал нишон дода шудааст, рушди иқтисодӣ ва дурнамои стратегии инкишофи он мебошад. Муаллиф баҳри пешрафти ин соҳа роҳу воситаҳоро нишон дода, камбудиҳои дар ин самт ҷойдоштаро баррасӣ намудааст. Барои ноил шудан ба чунин ҳадафи стратегӣ рушди соҳаи сайёҳӣ, саноаткунонӣ ва пешбурди сиёсати минтақавии кишварро афзал медонанд.
Пешвои миллат оид ба сатҳи некуаҳволӣ ва солимии миллат, муҳоҷирати меҳнатӣ ва танзими он, пешрафти илму маорифи кишвар низ ибрози андеша намудаанд.
Дар китоби мазкур масъалаи баланд бардоштани фарҳанги миллӣ ва сиёсии шаҳрвандон низ ба таври васеъ шарҳу баён ёфтааст. Махсусан, дар раванди баланд бардоштани маданияти сиёсии мардум нақши арзишҳои ҷомеаи демократӣ ва ниҳодҳои ҷомеаи шаҳрвандиро зикр мекунанд. Аҳамияти иттиҳодияҳои ҷамъиятиро барои давлатдории миллӣ аз он иборат медонанд, ки метавонанд дар муттаҳид ва сафарбар кардани шаҳрвандон саҳм гузоранд. «Дар самти мазкур бисёр муҳим аст, ки созмонҳои ҷамъиятӣ мавқеи давлатмеҳварӣ дошта бошанд ва ба арзишҳои умумии соҳибихтиёрии давлатӣ эҳтиром гузоранд. Дар акси ҳол, онҳо метавонанд ба сифати «неруи нарм» - и кишварҳои хориҷӣ баромад намуда, ҳамчун пешбарандаи арзиш ва анъанаҳои бегона фаъолият кунанд». Дарвоқеъ, барои устувор намудани пояҳои давлатдории миллӣ ва ҳисси худогоҳии шаҳрвандон нақши маданияти сиёсӣ барҷаста аст. Ҳар қадаре ки сатҳи маърифатнокии мардум баланд бардошта шавад, ҳамон миқдор рушду инкишофи ҷомеа таъмин мегардад. Ба андешаи муаллиф ин барои баланд бардоштани зиракии сиёсии ҷавонон муҳим мебошад.
Дар охирсухан муаллиф ҷойгоҳи Ҷумҳурии Тоҷикистонро дар сиёсати байналмилалӣ баррасӣ намуда, равобити дипломатии онро бо кишварҳои ҷаҳонӣ нишон додаанд. Ҳамчунин, аз ҳифзи манфиатҳои миллӣ дар сиёсати ҷаҳонӣ мисолҳо оварда, ташаббусҳои байналмилалии Тоҷикистонро дар ин самт хеле муҳим арзёбӣ мекунанд.
Ҳамин тавр, китоби «Уфуқҳои истиқлол» сарчашмаи муътамад ва нодири маълумот оид ба дастовардҳои замони соҳибистиқлолии кишвар мебошад. Муаллиф дар он мушкилот ва дастовардҳои тамоми самтҳои ҷомеаро мавриди омӯзиши амиқ қарор додаанд. Ва ҳам он чун дастури пурарзиш барои шинохти арзишҳои замони соҳибистиқлолӣ ва ташаккули худшиносии миллӣ, алалхусус барои ҷавонон, аҳамияти хосса дорад. Аз ин рӯ, бояд дар мактабҳои олии кишвар мавриди омӯзиш қарор бигирад.
Фазилат САИДОВА,
ходими илмии Институти фалсафа,
сиёсатшиносӣ ва ҳуқуқи Академияи илмҳои ҷумҳурӣ
Баёни ақида (0) Санаи нашр: 16.01.2019 №: 13 Мутолиа карданд: 868
