ҳуқуқ
КИБЕРТЕРРОРИЗМ. (ҶАНГИ ИТТИЛООТӢ) ЧИСТ?
Истифода намудан аз ВАО ин роҳи хеле осон, бехатар ва бе ҷавобгарӣ расидан ба мақсадҳои худ мебошад. Аз ҷониби дигар, дар замони муосир ва ҷомеаи имрӯза таъсири сухан ба мафкураи одамон аз таъсири яроқ дида бештар аст. Аз ин лиҳоз, кишварҳои абарқудрат аз қувваи ВАО хеле хуб истифода мебаранд ва тавассути медиа - психология тарғиб ва ташвиқи идеологияи худро ҷорӣ месозанд.
Медиа - психология ин худ тавассути технологияҳои навини аудиовизуалӣ намоиш ва таъсир расондан ба аудитория мебошад. Ҷанги итилоотӣ мубориза миёни давлатҳост, ки бо мақсади ба даст овардани афзалиятҳои низомию сиёсӣ, иҷтимоию иқтисодӣ ва, умуман, манофеъ бо роҳи паҳнкунӣ ва истифодаи тамоми намудҳои иттилоот роҳандозӣ мешаванд. Кибертерроризм усулест, ки миёни давлатҳо аз муборизаи тиру туфанг ва яроқҳои ҳастаӣ дида садҳо маротиб болост ва ин навъ муҳориба ба воситаи иттилоот яъне ҷанги иттилоотӣ сурат гирифта, бе талафоти ҷонӣ анҷом дода мешавад. Дигар ин ки, сухани журналист дар ҳолати ҷангу нооромиҳо метавонад чун даво ба дарди ҷомеа бошад ва боиси ором шудани вазъият гардад. Аз ҷониби дигар метавонад сабаби нооромиҳо шавад, ҷонибҳои зид ва мухолифро бо ҳам шӯронад ва ба нооромӣ даъват намояд. Дар чунин вазъият он метавонад боиси авҷ гирифтани инқилобу нооромиҳо ва кушта шудани ҳазорон шахси бегуноҳ гардад.
Иттилоотонӣ ва муборизаи иттилоотӣ тайи чанд соли охир дар тамоми давлатҳои дунё, махсусан ба тариқи расонаҳои иҷтимоӣ, нисбат ба дигар намуди ВАО қувваи бештаре пайдо намудааст. Бо истифода аз равнақ ёфтани системаҳои иттилоотрасонӣ гурӯҳҳои тундрав ва ҷудоихоҳу фитнаандоз ҳадафҳои хешро бо истифода аз дину оин ва либоси исломӣ миёни мардум пиёда месозанд ва, ба ин васила, афроди ноогоҳ аз донишҳои динӣ ва дунявиро ба самти хеш мекашанд, то ҳадафҳои ғаразноки хешро тавассути эшон миёни мардум тарғиб намоянд. Албатта, надоштани донишҳои комили динӣ ва гирифтор шудан ба доми ин рубоҳтинатони кӯрдил тариқи расонаҳои иҷтимоӣ ҷомеаи ҷаҳониро ба ташвиш овардааст. Бояд гуфт, ки саркардагони Ҳизби террористӣ ва экстремистии наҳзати исломӣ маҳз тариқи ана ҳамин расонаҳои иҷтимоӣ ва сомонаҳои ба худ хос, ки блогерони онҳо таъсис додаанд, ақидаҳои ифротангез ва нопоки худро баён месозанд. Хонандаи азиз, матлаб аз ин гуфтаҳо дар он аст, ки ҳаргиз гуфтаҳои ҷома ва салладорони нопоке, ки зидди сиёсат ва миллати соҳибтамаддуни тоҷик дар расонаҳои интернетӣ чи ба тариқи навор бошад ва чи ба тариқи нигориш ҳаргиз бовар мадоред.
Худ гувоҳед, ки саркардагони ҲНИ ва чанде аз ҳамақидаҳояшон ӯ ба хотири луқмаи ночизе ба модару Ватан ва миллати хеш хиёнат намуданд ва шармандавор ба хориҷи кишвар гурехтанд ва онҳоро ҳаргиз Ватану миллат нахоҳад бахшид.
Ҳамин тариқ, журналистони ҳирфаӣ вазифадоранд, то суду зиёни истифодаи интернет ва дурустии маводҳои нигошташударо ба мардум фаҳмонанд, чаро ки сухани журналист ҳангоми нооромиҳо ба равони аудитория таъсири даҳчанд дорад. Аз ин рӯ, ба психологияи аудитория ҳар як журналисте, ки дар чунин шароит аҳамият медиҳад, бояд вазифаи худро аз ҳарвақта дида хубтару комилтар ба иҷро расонад. Ҳангоми баёни ақидаҳояш эҳтиёткор бошад ва кӯшиш намояд, то аудиторияро рӯҳан ором созад.
Бахтовар ҚАЛАНДАРОВ, хабарнигор, узви ИЖТ
Баёни ақида (0) Санаи нашр: 23.01.2019 №: 18 Мутолиа карданд: 1251
