ҳуқуқ
ҶИНОЯТ ва ҶАЗО
3 ҲОЛАТИ ДУЗДӢ
1. Ба ШВКД дар ноҳияи Мастчоҳ марди 32 - солаи сокини Ҷамоати деҳоти Оббурдон, корманди ҶДММ «Сафедгул - 786», муроҷиат кард, ки шаби 24 - 25 декабри соли 2018 шахсони номаълум бо роҳи пинҳонӣ ба корхона даромада, 2 тонна пахтаро, ки маблағи умумиаш 28 000 сомониро ташкил медиҳад, дуздида аз ҷои ҳодиса ғайб заданд.
Зимни гузарондани чорабиниҳои фаврӣ - ҷустуҷӯӣ аз ҷониби кормандони милитсия 3 нафар сокини ҷамоати зикргардида, бо ҷурми дуздӣ дастгир шуданд.
Оид ба ин ҳодиса парвандаи ҷиноятӣ бо моддаи 244 қисми 4 Кодекси ҷиноятии Ҷумҳурии Тоҷикистон оғоз шуда, тафтишот идома дорад.
2. Роҳбарияти филиали ҶСК «Тоҷиктелеком» ба ШВКД - 1 дар ноҳияи Сино мактуб ирсол кард, ки моҳи ноябри соли 2018 шахсони номаълум аз зери бинои истиқоматӣ дар кӯчаи Ҷ. Расулови пойтахт ноқилҳои телефониро, ки арзишашон 17 ҳазору 570 - сомониро ташкил медиҳад, дуздида, аз ҷои ҳодиса ғайб мезананд.
Бо доир намудани чорабиниҳои фаврӣ - ҷустуҷӯӣ кормандони милитсия ду нафар ноболиғи 16 - 17 - соларо бо гумони дуздӣ дастгир карданд. Ин ҳодиса мавриди тафтиш қарор дорад.
3. Ба ШВКД дар шаҳри Кӯлоб бо ариза зани 42 - солаи сокини шаҳр муроҷиат кард, ки шаби 17 ба 18 январи соли 2019, шахсони номаълум ба хонаи истиқоматиаш даромада, аз он ҷо 3000 сомонӣ, 1 адад телефони мобилии тамғаи «Самсунг» ва 1 адад гарданбанди нуқрагӣ, ки арзишаш 3200 - сомониро ташкил медиҳад, дуздида аз ҷойи ҳодиса ғайб задаанд. Ҳангоми гузарондани чорабиниҳои фаврӣ - ҷустуҷӯӣ аз ҷониби кормандони милитсия ҷавони 20 - солаи сокини шаҳри Кӯлоб, донишҷӯи соли 3 - юми Донишкадаи технология ва менеҷменти иноватсионии шаҳри Кӯлоб бо гумони дуздӣ дастгир карда шуд.
Ҳамчунин, ба ШВКД дар ноҳияи Ҷалолиддини Балхӣ зани 35 - солаи сокини деҳаи Деҳқонободи ноҳияи мазкур бо ариза муроҷиат мекунад, ки моҳи январи соли 2018 шахсони номаълум бо роҳи пинҳонӣ ба хонаи истиқоматиаш даромада, аз он ҷо 1 адад телевизори тамғаи “Самсунг”, ҷавоҳироти гуногуни тиллоӣ ва нуқрагиро, ки арзиши умумиашон 10 ҳазору 500 сомониро ташкил медиҳад, дуздида аз ҷои ҳодиса ғайб заданд. Ҳангоми гузарондани чорабиниҳои фаврӣ - ҷустуҷӯӣ кормандони милитсия марди 32 - солаи сокини деҳаи Калинини ҳамин ноҳияро, ки пеш бо моддаи 244 Кодекси ҷиноятии Ҷумҳурии Тоҷикистон суд шудааст, бо гумони дуздӣ дастгир намуданд. Аз рӯи ин ҳодисаҳо тафтишот идома дорад.
Шуъбаи ҳуқуқи рӯзномаи «Ҷумҳурият»
Баёни ақида (0) Санаи нашр: 23.01.2019 №: 18 Мутолиа карданд: 1002
