иқтисод
ТИБ. ГИЁҲДАРМОНИИ ВАТАНӢ ТАВСЕА МЕЁБАД
Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон 1 сентябри соли сипаришуда зимни суханронӣ дар назди донишҷӯёну устодон ва масъулони соҳаи тандурустии кишвар бори дигар ба масъалаи гиёҳдармонӣ ва дорусозӣ аз гиёҳҳои шифобахш рӯй оварда, аз ҷумла иброз доштанд: «Ҳарчанд ки мо аз гиёҳҳои шифобахш баъзе намудҳои дорувориро омода карда истодаем, вале имконоту захираҳои Тоҷикистон, ки дар ҳудуди он зиёда аз 3500 навъи гиёҳҳои шифоӣ мавҷуданд, ҳоло ҳам самарабахш истифода нашуда истодаанд».
Соли 2018 бо дастгирии Ҳукумати Ҷумҳурии Тоҷикистон дар мамлакат 4 корхонаи нави коркарди гиёҳҳои шифобахш, истеҳсоли маводи доруворӣ ва молҳои тиббӣ таъсис ёфт. 5 ноябри соли 2018 дар доираи сафари корӣ ба ноҳияи Данғараи вилояти Хатлон Сарвари давлат корхонаи истеҳсоли маводи бастубанди тиббӣ, косметологӣ ва гигиении «Фарм Текс» - ро ба истифода дода, аз масъулону мутахассисони корхона истеҳсоли маҳсулоти тиббии баландсифат ва бандубасти мутобиқ ба стандартҳои байналмилалиро тақозо намуданд. Дар корхонаи мазкур зиёда аз 70 корманд дар як баст ба кор ҷалб гардидааст.
Дар мавзеи Канаски Ҷамоати деҳоти Ромити шаҳри Ваҳдат дар назди КВД «Хоҷагии ёрирасони Канаск» корхонаи коркарди гиёҳҳои шифобахш таъсис ёфт. Дар он 7 намуди гиёҳҳои шифобахши ин мавзеъ коркард ва бастубанд мешаванд.
Дар ҶДММ «Райҳон фарма» - и шаҳри Душанбе ва ҶДММ «Олим фарма» - и ноҳияи Рӯдакӣ сехҳои истеҳсоли маводи доруворӣ дар шакли шарбат (сироп) ба роҳ монда шуд.
Ҳамчунин, имрӯзҳо дар тамоми муассисаҳои тиббии кишвар гӯшаҳои гиёҳдармонӣ ва утоқҳои гиёҳпизишкӣ кушода шудаанд, ки дар онҳо беморон бо гулу гиёҳҳои ватанӣ табобат мешаванд. Яъне гиёҳдармонӣ дар раванди ташаккули тарзи ҳаёти солим мавқеи сазовори худро пайдо карда истодааст.
Шаҳбоз АБРОР, «Ҷумҳурият»
Баёни ақида (0) Санаи нашр: 25.01.2019 №: 19 Мутолиа карданд: 999
